Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 240 Hüküm no: 266 Orijinal metin no: [39b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinan Bey b. Bâli’nin tarlasının kullanım hakkını Kika v. Adam’a devretmesi Vilâyet-i Rumeli’nde Mora sancağına Kalavrita kazâsına tâbi‘ Pankarat nâm karyeden fahrü’l-eşbâh Sinan Bey b. Bâli nâm cündî meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Kika v. Adam nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında vâki‘ bir tarafdan Haydar b. Aydın tarlasına ve bir tarafdan vâdiye ve iki tarafdan Gāzi Çelebi tarlasına müntehî ve mahdûd olup tahmînen diyârımız keyli ile beş keyl tohum istî‘âb eder bir kıt‘a mutasarrıf olduğum tarlanın hakk-ı tasarrufunu sâhib-i arz ma‘rifetiyle mesfûr Kika’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan iki bin üç yüz nakd-i fıddî-i Osmânî râyic fi’l-vakt akçeyi mezbûr Kika yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân hudûd ile mahdûd olan tarla mersûmundur sâir emsâli tasarrufu gibi keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Kika vicâhen tasdîk ve şifâhen tahkīk edicek mâ hüve’l-vâki‘ gıbbe’l-ibtigā ketb olundu. Hurrire fî 13 min Cumâdelâhire li sene 1029. Şuhûdü’l-hâl: Hamza Bey b. İbrahim el-Cündî Mehmed Bey b. Hüseyin el-Cündî Ayaz Bey b. Hüseyin, Kurd Beşe b. Abdullah el-Acemî, Süleyman b. Turgud, Yakub b. Kurd, Perviz b. Abdullah.