Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 242 Hüküm no: 268 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Hüseyin’in kaybolduktan sonra bulunan atının kendisine iadesi Vilâyet-i Rumeli’nde Drama kazâsına tâbi‘ Doksad nâm karye sükkânından fahrü’l-akrân Hüseyin Bey b. Hüseyin nâm cündî meclis-i şer‘-i şerîfde Apostol v. Avyaro nâm zimmîyi ihzâr ve üzerine takrîr-i da‘vâ edip târih-i kitâbdan on sekiz ay mukaddem Halil Paşa hazretleri ile Erdebil seferinden gelirken Şebinkarahisarı kurbunda silk-i mülk-i sahîhimde münselik olan bir kır bârgirim mülkümden zâyi‘ olmuşdu hâlâ zikr olunan bârgiri mezbûr Apostol yedinde buldum, suâl olunup bi hasebi’ş-şer‘ lâzımı icrâ olunmak matlûbumdur dedikde gıbbe’s-suâl mezbûr Apostol feth-i makāl edip cevâbında zikr olunan bârgiri sûk-ı sultânîde müzâyede olunurken işbu gāib ani’l-meclis olup vilâyet-i merkūmede kazâ-i Siroz sâkinlerinden Kiryazi nâm zimmîden iki bin yirmi akçeye iştirâ eyledim senin olduğu ma‘lûmum değildir deyû husûs-ı mezbûru bi’l-külliyye inkâr edicek müdde‘î-i mezbûrdan sıdk-ı kelâmını mübeyyine beyyine taleb olundukda udûl-i müslimînden Hüseyin Bey b. Sefer ve Mehmed Bey b. Sefer nâm kimesneler li ecli’ş-şehâde meclis-i şer‘a hâzırân olup fi’l-vâki‘ târih-i kitâbdan on sekiz ay mukaddem Halil Paşa hazretleri ile seferden gelirken Şebinkarahisarı kurbunda mezbûr Hüseyin b. Hüseyin zikr olunan bârgirini mülkünden zâyi‘ eylemişdi, bu bârgir dahi bi aynihî ol bârgirdir bu husûsa minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde mezbûrânın şehâdetleri hayyiz-i kabûl ve mahall-i irtizâda vâkı‘a oldukdan sonra mezbûr Hüseyin mârrü’z-zikr bârgiri âhara bey‘ etmeyip ve vücûh-ı şer‘iyyeden bir vechile mülkünden ihrâc etmeyip bu âna gelinceye mülkünde münselik idiğine yemîn teklîf olundukda yemîn billâhi’l-aliyyi’l-azîm etmeğin mârrü’z-zikr bârgiri mezbûr Hüseyin Bey’e teslîme mezbûr Apostol’e tenbîh birle işbu hurûf ber sebîli’t-temessük ketb ve imlâ olundu. Hurrire fi’l-yevmi’s-sâmin ve’l-ışrîn min Cumâdelâhire li sene tis‘a ve ışrîn ve elf. Şuhûdü’l-hâl: Mustafa b. Mehmed, Ali b. Abdullah, Süleyman b. Turgud, Yakub b. Kurd.