Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 242 Hüküm no: 269 Orijinal metin no: [40a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Mustafa’nın menzil selâmlığını oğlu İbrahim Çelebi’ye hibe etmesi Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Takyeci nâm mahallesi sâkinlerinden Ali b. Mustafa nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb sulbî kebîr oğlu İbrahim Çelebi mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Hasan Bey b. Mustafa mülküne ve bir tarafdan vakıf menzile ve bir tarafdan Musa Bey mülküne ve bir tarafdan tarîk-i âma müntehî ve mahdûd olup işbu akdin sudûruna dek silk-i mülk-i sahîhimde münselik ve münharıt olan mülk menzilin ve menzilin selâmlığını mülkümden ifrâz ve ta‘yîn edip oğlum mezbûr İbrahim’e hibe-i sahîha-i şer‘iyye ile hibe ve temlîk eyledim ol dahi meclis-i hibede kabz ve tesellüm eyledi ba‘de’l-yevm sâlifü’l-beyân menzilin selâmlığı oğlum merkūm İbrahim’in mülk-i mevhûbudur keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr İbrahim Çelebi vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî gurreti Recebi’l-ferd li târihi’l-mezbûr. Şuhûdü’l-hâl: Mehmed Çelebi b. Mahmud, İbrahim Çelebi eş-şehîr bi Halîmzâde, Hasan Çelebi b. Mustafa, Mehmed b. Zünnûn, Mehmed b. Mustafa, Musa, Sefer Beşe b. ( ), Mustafa b. Mehmed, Ali b. Abdullah, Perviz b. Abdullah, Yakub b. Kurd, Süleyman b. Turgud.