Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 246 Hüküm no: 275 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köni’nin oğulları Yorgo ve Yani’nin bağlarını Yorgo v. Dimo’ya satıp tarlalarının da kullanım hakkını devretmeleri Vilâyet-i Rumeli’nde Avlonya sancağında Ergirikasrı kazâsına tâbi‘ Sinagopolo[s] nâm karye sâkinlerinden Yorgo ve Yani veledey Köni nâm zimmîler meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yorgo v. Dimo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yani v. Mankol bağına ve üç tarafdan mezra‘a-i âti’l-beyâna müntehî ve mahdûd tahmînen altı çapalık bir kıt‘a mülk bağımızı cümle-i tevâbi‘ ve levâhıkı ile mezbûr Yorgo’ya altı yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eylediğimden sonra yine karye-i merkūmede vâki‘ lede’l-ahâlî ma‘lûmü’l-hudûd tahmînen diyârımız keyli ile bir keyl tohum istî‘âb eder mutasarrıf olduğumuz beş kıt‘a tarlanın hakk-ı tasarruflarını sâhib-i arz ma‘rifetiyle merkūm Yorgo’ya tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan altı yüz nakd-i fıddî-i Osmânî râyic fi’l-vakt akçeyi bi’t-tamâm ve’l-kemâl merkūm Yorgo yedinden ale’l-iştirâki’s-seviy ahz ve kabz eyledik ba‘de’l-yevm sâlifü’l-beyân bir kıt‘a bağ-ı merkūm Yorgo’nun mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları mersûmundur sâir emsâli tasarrufları gibi keyfe mâ yeşâ ve yahtâr mutasarrıf olsun dediklerinde mukırrân-ı mezbûrânın minvâl-i muharrer üzre cârî olan ikrâr ve takrîrlerin el-mukarru lehü’l-mezbûr Yorgo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer min Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Pande v. Mankol, Boncekle v. Niko, Kiro v. Papa, Yani v. Nika, Niko v. Köni, Yorgo v. Dimo, Yorgo v. Meniko, Kini v. Kivlaş, Niko v. Duka ve gayruhüm mine’l-hâzırîn.