Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 247 Hüküm no: 276 Orijinal metin no: [41a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hâtun Vakfı’na ait harap menzilin satılarak yerine aynı değerde yeni bir menzil alınması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Yâvedûd mahallesi sâkinlerinden Belkıs bt. Abdullah nâm hâtun meclis-i şer‘-i hatîr-i lâzımü’t-tevkīrde sevk-i kelâm edip mahalle-i mezbûrede vâki‘ merhûme Rahime Hâtun bt. ( ) vakfı’ndan olup süknâsı bana meşrûta olan üç tarafdan mekābir-i müslimîne ve bir tarafdan tarîk-i hâssa müntehî ve mahdûd iki tahtânî beyti ve muhavvatayı müştemil vakıf menzil tûl-i zamân ile harâbe müşrif ve dâsir olup ta‘mîr ve termîmine müsâ‘ade olmayıp ve benim dahi ta‘mîr ve termîme adem-i kudretim olduğundan mâ‘adâ menzil-i mevkūf mekābir-i müslimîn içinde olmağla icâre-i tavîle âhar tâlibi dahi olmamağın her vechile menzil-i mezbûr bey‘ olunup semeni ile alâ sebîli’l-istibdâl ve ibdâl menzil-i âhar iştirâ olunmak evlâ ve ahrâ ve cânib-i vakfa menâfi‘-i kesîre olduğu müttefekun-aleyh olmağın cânib-i şer‘-i mutahhardan zikr olunan menzilin üzerine varılıp vâki‘ hâl tahrîr ve tebyîn olunup istibdâl olunmasına cânib-i şer‘-i kavîmden istîzân ederim dedikde menzil-i mevkūf-ı mezbûrun zeyl-i kitâbda mastûrü’l-esâmî olan müslimîn ile üzerine varılıp harâbı keşf ve tahrîr olundukda fi’l-hakīka mârrü’z-zikr menzil harâbe müşrif olup bu def‘a dahi istibdâl olunmayıp ihmâl olunursa bi’l-külliyye münhedim ve bî-menfa‘at olduğu mu‘âyene ve müşâhede olundukdan sonra mezbûre Belkıs’a menzil-i mevkūf-ı mezkûru ba‘de’l-izn işbu hâzır bi’l-meclis olan Mehmed b. Abdullah nâm kimesneye ba‘de’l-müzâyedeti’ş-şer‘iyye vakf-ı mezbûr için altı bin nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen ve teslîm-i müsemmen eylediğinden sonra yine medîne-i mezbûre mahallâtından Baba Haydar mahallesi sâkinlerinden Maden b. Davud nâm kimesne meclis-i şer‘de mezbûre Belkıs mahzarında bi’t-tav‘ ikrâr edip mahalle-i mezbûrede vâki‘ bir tarafdan yine benim mülküme ve bir tarafdan Mehmed’in mülküne ve bir tarafdan Seyyâre bt. Abdullah mülküne ve bir tarafdan tarîk-i âma müntehî ve mahdûd bir tahtânî [41b] beyti ve sofayı ve muhavvatayı ve kenîfi ve bir bi’r-i mâyı ve zât-ı eşcâr-ı müsmireyi hâvî cüneyneyi müştemil olan mülk menzilimi cümle-i tevâbi‘ ve levâhıkı ile mezbûre Belkıs’a meblağ-ı mezbûr altı bin nakd-i mezbûrü’n-na‘t akçeye vakf-ı mezbûr için bâtten bey‘ edip kabz-ı semen ve teslîm-i müsemmen eyledim dedikde mukırr-ı mezbûrun minvâl-i muharrer üzre cârî olan ikrâr ve takrîrin mezbûre Belkıs vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ [min Cumâdelâhire] li târihi’l-mezbûr. Şuhûdü’l-hâl: İlmüddin Efendi b. Süleyman el-İmâm, İbrahim b. Ali, Mustafa b. Abdullah er-Râcil, Mehmed b. Tahir, Memi b. Eyüb, Ferhad b. Abdullah, Ahmed b. Abdullah, Receb b. Abdullah, Osman b. Abdullah, Yusuf b. Abdullah, Mustafa b. Mehmed ve gayruhüm mine’l-hâzırîn.