Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 180 Hüküm no: 149 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Abdülbâki’nin vakıf odasının sulehâdan Ahmed Çelebi’ye Kur’ân-ı Kerîm tilâvet etmek şartıyla verildiği Merhûm el-Hâc Abdülbâkī nâm sâhibü’l-hayrın süknâsı sulehâ-yı mütezevvicînden kırâat-i Kur’ân-ı azîmü’ş-şâna kādir kimesne bulunursa günde bir cüz’-i şerîf, bulunmazsa günde bir Yâsin-i şerîf bulunmazsa günde üç İhlâs-ı şerîf ve bir Mu‘avvizeteyn ve bir Fâtiha-i şerîfe tilâvet etmek üzre her biri bir recül-i sâliha şurût-ı vakfı olup mahmiye-i İstanbul’da Hoca Üveys mahallesinde vâki‘ biri birine muttasıl beş bâb odalardan üç tarafdan vakf-ı mezbûr ve bir tarafdan tarîk-i âm ile mahdûd bir bâb odayı tevcîh-i hâkim ile mutasarrıf olan Mehmed b. Zülfikār nâm kimesne babasının kız karındaşı oğlu Ahmed Çelebi b. Mehmed nâm kimesneye fâriğ olup kasr-ı yed etmekle zikr olunan odanın süknâsı mahlûle ve işbu râfi‘ü’l-kitâb mezbûr Ahmed Çelebi sulehâdan olup her vechile mahal ve müstahık olmağın ber mûceb-i şart-ı vâkıf oda-i mahdûd-ı mezbûrun süknâsı taraf-ı şer‘-i şerîfden mezbûr Ahmed Çelebi’ye tevcîh olunup tasarrufiyçün bu vesîka-i enîka ketb ve imlâ olunup yedine def‘ ve i‘tâ olundu. Fi’l-yevmi’s-sâbi‘ ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Umdetü’l-eimme Mehmed Efendi b. Mustafa, İbrahim Çelebi b. Halil, Hasan Efendi b. Mustafa el-İmâm, Abdullah Efendi b. Mustafa el-Müezzin.