Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 252 Hüküm no: 284 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Hamza’nın Kurd Bey Vakfı’na olan borcunu ödediğinin anlaşılması Havâss-ı Aliyye kazâsı tevâbi‘inden Hasköy’de Kiremidlik nâm mevzi‘de vâki‘ Abdüsselâm mescidi’ne imâm olup ber vech-i meşrûtiyyet Kurd Bey vakfı’na mütevellî olan Hüseyin Halîfe b. Abdullah meclis-i şer‘-i hatîr-i lâzımü’t-tevkīrde zümre-i yeniçeriyândan Hasan Beşe b. Hamza nâm râcil ihzâr ve takrîr-i da‘vâ edip vakf-ı mezbûr malından merkūm Hasan Beşe zimmetinde on bin nakd-i fıddî-i Osmânî râyic fi’l-vakt akçe vardır tevliyyet-i mahkiyem hasebiyle bi hasebi’ş-şer‘i’ş-şerîf suâl olunup tahlîs olunması matlûbumdur dedikde gıbbe’s-suâl mezbûr Hasan Beşe cevâbında fi’l-hakīka vakf-ı mezbûr malından zimmetimde on bin akçe var idi ve lâkin sâbıkan vakf-ı mezbûra mütevellî olan vâkıf-ı mezbûrun sulbî oğlu Ali nâm kimesne[ye] edâ ve îfâ edip ba‘dehû karye-i merkūmede nâibü’ş-şer‘ olan mevlânâ İbrahim Efendi huzûrunda on bin nakd-i mezbûrü’n-na‘t akçeyi mezbûr Ali yedinden aldığına ikrâr etti deyû târih-i kitâb Cemâziyelevveli’nin târihiyle müverraha ve mûmâ-ileyh nâibü’ş-şer‘in hat ve hatmini müştemile hüccet-i şer‘iyye ibrâz edip nazar olundukda fi’l-vâki‘ mazmûn-ı hüccet mezbûr Hasan Beşe’nin takrîrine muvâfık ve mutâbık oldukdan sonra mütevellî-i mezbûr Hasan mazmûn-ı hücceti bi’l-külliyye inkâr edicek mezbûr Hasan Beşe’den sıdk-ı kelâmını mübeyyine beyyine taleb olundukda udûl-i müslimînden Hasan b. Hüseyin ve Usta Bilâl b. Ramazan ve Mehmed b. Hüseyin li ecli’ş-şehâdeti meclis-i şer‘a hâzırûn olup fi’l-vâki‘ mütevellî-i sâbık Ali bizim huzûrumuzda mezbûr Hasan Beşe zimmetinde vakf-ı mezbûr malından olan on bin nakd-i mezbûrü’n-na‘t akçeyi mezbûr Hasan Beşe’den ahz ve kabz eyledim deyû ikrârına edâ-i şehâdet-i şer‘iyye ettiklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra mezbûr Hasan Beşe’ye husûs-ı mezbûrda hîle vukū‘a etmediğine yemîn teklîf olunup ol dahi yemîn billâhi’l-aliyyi’l-a‘lâ etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn [min Cumâdelâhire] li târihi’l-mezbûr. Şuhûdü’l-hâl: Mahmud b. Hasan, İlyas b. Mehmed, Pîrî b. Rıdvan, Hasan Beşe b. Mehmed er-Râcil, İbrahim Çelebi b. Mustafa, Yakub b. Kurd, Yusuf b. Abdullah, Mehmed b. Kasım el-Hatîb, Perviz b. Abdullah ve gayruhüm.