Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 257 Hüküm no: 290 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemihan Hâtun bt. İbrahim Çavuş’un çayırına müdahale edilmemesi Cerâ mâ hurrire fîhî ledeyye ve vaka‘a cemî‘u mâ yahvihî beyne yedeyye ve ene’l-fakīr ile’l-mevlâ’l-kerîm Ramazan b. İbrahim el-müvellâ bi Silivri hilâfeten Afâ anhümâ hâliku Rabbühü’l-Beriyye Havâss-ı Aliyye tevâbi‘inden kasaba-i Silivri nâhiyesinde vâki‘ Akviran nâm karyede çiftliği olan zahrü’l-muvakkarât İstemihan Hâtun bt. İbrahim Çavuş tarafından husûs-ı âti’l-beyâna vekîl olup hasm-ı şer‘î-i câhid mahzarında Mehmed Çelebi b. Ta[hir] ve Osman Beşe b. Abdullah şehâdetleri ile vekâleti sâbite olan Murtaza Beşe b. Abdullah nâm kimesne vekâleten mahfil-i kazâda karye-i merkūmede müsellem tâifesinden Emrullah b. Timur ve Ali b. Ahriyan ve Mustafa b. Erbeyi nâm kimesneler mahzarlarında üzerlerine takrîr-i da‘vâ edip mezbûrların toprağı dâhilinde Dörderci Hasan çayırı demekle ma‘rûf çayırın bir tarafı sabancı Osman Çayırı ve bir tarafı Hüseyin Çavuş çayırı ve bir tarafı Emrullah çayırı ve bir tarafı Müsellemler çayırı demekle ma‘rûf çayır ile mahdûd ve mümtâz olan bir kıt‘a çayır müvekkilemin babası merhûm İbrahim Çavuş’un elli altmış seneden mütecâviz tasarrufunda olup bundan akdem bin on altı senesinde vâki‘ Rebî‘ulâhire’de bi emrillâhi te‘âlâ mezbûr İbrahim Çavuş fevt oldukda evlâd-ı zükûru kalmayıp zikr olunan çayır kānûn üzre tapuya müstahık olmağın mezbûr Emrullah’ın müsellem ocağında şerîkleri olan Mehmed b. Murad ve Osman b. Hasan ve mezbûr Mustafa’nın babası merkūm Erbeyi nâm müsellemlerden müvekkilem merkūme İstemihan Hâtun tapulayıp yedine mühürlü tezkire alıp on iki seneden beri tasarrufunda iken hâlâ zevci olup fevt olan İbrahim Subaşı mücerred zevci olmak ile zikr olunan çayır anındır evlâd-ı zükûru yokdur tapuya müstahak olmuşdur deyû fuzûlen âhara vermek kasdına vaz‘-ı yed ederim ve bi’l-cümle yedinde olan tapu tezkiresi mûcebince şer‘an görülmesi için Dergâh-ı âlî -dâme mahfûfen bi’l-me‘âlî- çavuşlarından kıdvetü’l-a‘yân Davud Çavuş mübâşeretiyle yedinde buyruldu-yı şerîf ve mûcebince mürâsele-i münîf vârid olup yedinde olan tapu tezkiresi ibrâz olunup nazar olundukda mazmûn-ı tezkire takrîrine muvâfık olup yüzlerine kırâ’at olundukda ta‘arruzları ne vechile idiği suâl olunmak taleb olunmağın gıbbe’s-suâl mezbûrlar bir vechile cevâba kādirler olmayıp merhûm İbrahim Çavuş elli altmış seneden beri mutasarrıf olup târih-i merkūmda fevt oldukda merhûm-ı mezbûrun evlâd-ı zükûru kalmayıp tapuya müstahık olmağın müvekkile-i merkūme İstemihan Hâtun’a tapu ile verildiğini bi’t-tav‘ ve’r-rızâ mukarrun-leh olmağın mûceb birle mu‘ârazadan men‘ olunup mâ hüve’l-vâki‘ bi’t-taleb ketb olundu. Hurrire fî evâsıtı Recebi’l-ferd li sene semân ve ışrîn ve elf. Şuhûdü’l-hâl: es-Sâbıkūn.