Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 258 Hüküm no: 291 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Yani’deki alacağın tahsil edildiği Vilâyet-i Rumeli’nde Gördös kazâsına tâbi‘ Koçiyori nâm karye sâkinlerinden fahrü’l-a‘yân Ömer Beşe b. Murad nâm râcil meclis-i şer‘-i mutahharda, işbu hâmil-i hâze’l-kitâb kasaba-i Anabolu sâkinlerinden Manol v. Yani nâm zimmî mahzarında ikrâr ve takrîr-i kelâm edip merkūm Manol zimmetinde karz-ı şer‘îden on iki bin nakd-i fıddî-i Osmânî râyic fi’l-vakt akçe ve çuka bahâsından bin sekiz yüz akçe ki cem‘an on üç bin sekiz yüz akçe hakkım vardı el-hâletü hâzihî meblağ-ı mezbûru mezbûr Manol yedinden bi’t-tamâm ve’l-kemâl ahz ve kabz eyledim bâkī zimmetinde bir akçe ve bir habbe kalmadı dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-merkūm Manol bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ ve vaz‘ olundu. Hurrire fi’l-yevmi’s-sâdis ve’l-ışrîn min Cumâdelâhire li sene tis‘a ve ışrîn ve elf. Şuhûdü’l-hâl: Ramazan Çavuş b. Abdullah, Mustafa Çavuş b. Abdullah, Kurd Beşe b. Abdullah er-Râcil, Mustafa Beşe b. Abdullah er-Râcil, İbrahim Beşe b. Abdullah, Yakub b. Kurd.