Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 259 Hüküm no: 292 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çavuş b. Mehmed’in borcuna karşılık olarak Sinan Çavuş b. Abdülmennân’a bazı emlâkini rehin vermesi Vilâyet-i Rumeli’nde nefs-i Yanya sâkinlerinden mefharü’l-cüyûş Mahmud Çavuş b. Mehmed nâm kimesne meclis-i şer‘-i mutahharda, işbu hâmil-i hâze’l-kitâb iftihârü’l-emâsil ve’l-a‘yân Sinan Çavuş b. Abdülmennân tarafından husûs-ı âti’z-zikri tasdîka vekîl olup bimâ hüve nehci’s-sübût şer‘an vekâleti sâbite olan Mahmud Bey b. ( ) mahzarında ikrâr ve takrîr-i kelâm edip deyn-i şer‘îden müvekkil-i müşârün-ileyh Sinan Çavuş’a târih-i kitâbdan yüz gün tamâmına varınca müeccel ve mev‘ûd otuz beş bin akçe zimmetimde lâzımü’l-edâ ve vâcibü’l-kazâ deynim olup kazâ-i mezbûra tâbi‘ İrdeşte nâm karyede vâki‘ bir tarafdan Mehmed Çavuş mülküne ve bir tarafdan Ebûbekir Bey mülküne ve bir tarafdan kestane ve bir tarafdan tarîk-i âma müntehî olan mülk çiftliğimi ve yine karye-i merkūmede lede’l-cîrân ma‘lûmü’l-hudûd bir kıt‘a mülk bağımı ve yine kazâ-i merkūme tâbi‘ Tahtalı nâm karyede vâki‘ inde’l-ahâlî ma‘lûmü’l-hudûd mülk çiftliğimi ve yine karye-i mezbûre dâhilinde vâki‘ inde’l-cîrân ma‘lûmü’l-hudûd üç kıt‘a mülk bağlarım dâyin-i mûmâ-ileyh Sinan Çavuş yedinde rehn-i makbûzdur dedikde mukırr-ı mezbûrun vech-i mübeyyen üzre cârî olan ikrâr-ı meşrûhunu vekîl-i mezbûr Mahmud Bey vicâhen tasdîk ve şifâhen tahkīk ettikden sonra kazâ-i mezbûr sâkinlerinden İstati v. Yani ve Rimo v. Yani nâm zimmîler meclis-i mezbûrda meblağ-ı mezbûra emr ve kabûlü hâviye kefâletle kefîl olduklarında mâ hüve’l-vâki‘ bi’t-taleb ketb olunup yed-i tâlibine def‘ olundu. Hurrire fi’l-yevmi’s-sâmin aşer min Cumâdelâhire li sene tis‘a ve ışrîn ve elf. Şuhûdü’l-hâl: Yusuf Bey b. Mehmed el-Cündî Dilâver Bey b. Abdullah el-Cündî Sinan Bey b. Bâli el-Cündî Hasan Bey el-Cündî Hasan b. Mehmed, Mustafa b. Mehmed, Yakub b. Kurd.