Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 259 Hüküm no: 293 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Bey b. Hüseyin’e kölesini satmasına izin verilmesi Medîne-i Ebâ Eyyûb el-Ensârî -râdiye anhu Rabbühü’l-Bârî-’de bi’l-fi‘l za‘îmü’l-vakt olan fahrü’l-eşbâh Abdi Bey b. Hüseyin nâm cündî meclis-i şer‘-i hatîr-i lâzımü’t-tevkīrde sevk-i kelâm edip işbu hâzır bi’l-meclis olan orta boyla kara gözlü Gürciyyü’l-asl Hasan b. Abdullah nâm abd işbu sene tis‘a ve ışrîn Rebî‘ulevveli’nin evâilinde ibâk ettiğine ikrârı ile ahz olunup kayd-ı sicil olunmuşdu hâlâ kānûn-ı pâdişâhî ve hükm-i şehinşâhî üzre zikr olunan evsâf ile mevsûf olan mezbûr Hasan’ın müddet-i örfiyyesi tamâm olduğu ecilden kıbel-i şer‘den bey‘ olunmasına temessük taleb ederim dedikde fi’l-vâki‘ abd-i mezbûrun müddeti tamâm olduğu sicill-i mahfûza nazar olundukda zâhir ve mütebeyyin olmağın ber mûceb-i kānûn-ı münîf mezbûr Abdi Bey’e merkūm Hasan’ı bey‘a kıbel-i şer‘den izin verilip işbu hurûf ber sebîli’t-temessük ketb olunup yed-i tâlibe def‘ ve vaz‘ olundu lede’l-hâce ibrâz ve ihticâc edine. Hurrire fi’l-yevmi’s-sâlis ve’l-ışrîn min Cumâdelâhire li sene tis‘a ve ışrîn ve elf. Şuhûdü’l-hâl: Mustafa b. Mehmed el-Muhzır, Ali b. Abdullah el-Muhzır, Elmas b. Abdullah hüve Habeşiyyü’l-asl?, Mehmed Bey b. Hasan, Yusuf b. Abdullah el-Muhzır ve gayruhüm mine’l-hâzırîn.