Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 261 Hüküm no: 296 Orijinal metin no: [44b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Abdullah’ın Koçi v. Nikola’ya bazı emlâkini satıp bazısının da kullanım hakkını devretmesi Vilâyet-i Rumeli’nde Ohri sancağında İstarova kazâsına tâbi‘ Niçe nâm karye sükkânından Ahmed Beşe b. Abdullah nâm râcil meclis-i şer‘-i şerîfde işbu râfi‘ü’l-kitâb Koçi v. Nikola nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Mankola v. Floro mülküne ve bir tarafdan Kosta v. Dine mülküne ve bir tarafdan Papa Mihal mülküne ve bir tarafdan tarîk-i âma müntehî bir tahtânî beyti ve dehlizi ve samanlığı ve muhavvatayı müştemil mülk menzilden ve yine menzil-i mezbûra muttasıl [ve] mülâsık lede’l-ahâlî ve’l-cîrân bir kıt‘a harmanı ve bir kıt‘a bostan yerinden nısf hisse-i şâyi‘alarımı, cümle-i tevâbi‘ ile bi safkatin vâhidetin Koçi’ye yedi yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘ât-ı mezkûreyi mahallinde kabza müşterî-i merkūmu taslît eylediğimden sonra yine karye-i mezbûre kurbunda bir kıt‘ası Demir Bey nâm kimesnenin menzili kurbunda ve bir kıt‘ası Taranya deresine ve bir kıt‘ası beylik çayırı kurbunda vâki‘ üç kıt‘a tarlanın hakk-ı tasarruflarını sâhib-i arz ma‘rifetiyle mezbûr Koçi’ye tefvîz edip ol dahi minvâl-i muharrer üzre tefevvüz ve kabûl eylediğimden sonra mukābele-i tefvîzde olan üç yüz akçeyi mezbûr Koçi yedinden ahz ve kabz eyledim ba‘de’l-yevm sâlifü’l-beyân mebî‘lerin nısfı mezbûr Koçi’nin mülk-i müşterâ-yı sarîhidir ve mârrü’z-zikr tarlaların hakk-ı tasarrufu dahi mersûmundur sâir emsâli tasarrufu gibi keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Koçi vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî evâhiri Cumâdelâhire li târihi’l-mezbûr. Şuhûdü’l-hâl: Mustafa b. Mehmed el-Muhzır, Ali b. Abdullah, Hüseyin b. Abdullah, Süleyman b. Turgud, Hasan b. Abdullah, Hüseyin b. Ali.