Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 261 Hüküm no: 297 Orijinal metin no: [44b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemse Hâtun’un menzilini Mehmed b. Abdullah’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Servi mahallesi mütemekkinelerinden Şemse Hâtun bt. Ömer tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında müvekkile-i mûmâ-ileyhâyı ma‘rifet-i [şer‘iyye ile ârifân olan Sefer Halîfe b. Veli ve Osman Beşe b. Abdullah şehâdetleri ile şer‘an sâbite ve mütehakkika olan İsa b. Hasan nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed b. Abdullah nâm râcil mahzarında bi’l-vekâle ikrâr ve takrîr-i kelâm edip müvekkilem mezbûre Şemse Hâtun’un silk-i mülk-i sahîhinde münselik [ve] mahalle-i mezbûrede vâki‘ bir tarafdan Hüsrev b. Hızır mülküne ve bir tarafdan Emine bt. Ali mülküne ve bir tarafdan Kamer bt. Abdullah mülküne ve bir tarafdan tarîk-i âma müntehî ve mahdûd bir tahtânî beyti ve iki fevkānîyi ve sundurmayı ve sofayı ve bi’r-i mâ ve kenîfi ve zât-ı eşcâr-ı müsmire ve gayr-ı müsmireyi hâvî cüneyneyi muhtevî muhavvatayı müştemil mülk menzilini cümle-i tevâbi‘ ve levâhıkı ve kâffe-i menâfi‘ ve merâfıkı ile mûmâ-ileyh Mehmed Beşe’ye on iki bin [nakd-i fıddî-i] Osmânî râyic fi’l-vakt akçeye bâtten bey‘ ve kabz ve teslîm-i mebî‘-i mahdûd kıldı ba‘de’l-yevm sâlifü’l-beyân menzil-i mahdûd mezkûr Mehmed Beşe’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde vekîl-i mezbûr İsa’nın minvâl-i muharrer üzre cârî olan ikrâr ve takrîri el-mukarru lehü’l-mezbûr Mehmed Beşe gıbbe’t-tasdîki’ş-şer‘î bi’t-taleb ketb olundu. Hurrire fî selhi Cumâdelâhire li sene tis‘a ve ışrîn ve elf. Şuhûdü’l-hâl: Receb Halîfe b. Ahmed el-İmâm, Hüseyin b. Mustafa el-Müezzin, el-Hâc Mehmed b. Pîrce, Mehmed b. Kasım el-Muhtesib, Hasan Bey b. Abdullah el-Bevvâbü’s-sultânî, Ali b. Abdullah, Mustafa b. Mehmed, Musa Efendi b. Sâdık, Perviz b. Abdullah ve gayruhüm mine’l-hâzırîn.