Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 262 Hüküm no: 298 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nikola’nın bağını Andriçe v. Yani’ye satması Vilâyet-i Rumeli’nde Mora sancağında Kartina kazâsına tâbi‘ İstemniçe nâm karyeden Yani v. Nikola nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Andriçe v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme bağları dâhilinde Koçeri demekle ma‘rûf mevzi‘de vâki‘ bir tarafdan Nikola v. Cerako? bağına ve bir tarafdan İskiyani v. Yorgi bağına ve bir tarafdan Dimo v. İstavroz ve bir tarafdan ( ) müntehî olup zât-ı eşcâr-ı müsmire ve gayr-ı müsmireyi hâvî tahmînen on çapalık bir kıt‘a bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Andriçe’ye yedi bin sekiz yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı mahdûd-ı mezkûr Andriçe’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Andriçe bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Cumâdelâhire li seneti’l-merkūme. Şuhûdü’l-hâl: Mustafa b. Mehmed, Ali b. Abdullah, Süleyman b. Turgud, Yakub b. Kurd, Perviz b. Abdullah, Yani v. Yorgi, İstemad v. Yani, Polenceroni v. Dimo, Lambo v. Yorgi, İspilot v. Dimo, Panayot v. Yorgi ve gayruhüm mine’l-hâzırîn.