Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 263 Hüküm no: 299 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nikola’nın menzilini Polenceroni v. Dimo’ya satması Vilâyet-i Rumeli’nde Mora sancağında Kartina kazâsına tâbi‘ İstemniçe nâm karyeden Yani v. Nikola nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Polenceroni v. Dimo nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Papa Yani v. Kostantin mülküne ve bir tarafdan Yorgi v. Karika mülküne ve bir tarafdan Yani v. Ribe mülküne ve bir tarafdan Yani v. Zakona mülküne ve bir tarafdan tarîk-i âma müntehî ve mahdûd bir tahtânî ve bir fevkānî beyti ve bir fırın ve iki dip dut eşcârını ve bir dip asma ağacını hâvî muhavvatayı müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Polenceroni’ye on bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm menzil-i mahdûd mezkûr Polenceroni’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Polenceroni vicâhen ve şifâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Cumâdelâhire li seneti’l-merkūme. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Süleyman b. Turgud, Perviz b. Abdullah, Yusuf b. Abdullah, Dimitri v. Yani, İspilot v. Ergiri, Dimo v. Valahaf, Yorgi v. Angeli, Aleksi v. Dimo, Andriçe v. Yani, Panayot v. Yorgi ve gayruhüm mine’l-hâzırîn.