Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 263 Hüküm no: 300 Orijinal metin no: [45a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Andriye’nin bir adet tarlasının kullanım hakkını Dimo v. Yani’ye devretmesi Vilâyet-i Rumeli’nden Gerbeniş kazâsına tâbi‘ Paparoş nâm karye sâkinlerinden Dimo v. Andriye nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Dimo v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırı dâhilinde vâki‘ bir tarafdan müşterî-i mezbûr tarlasına ve bir tarafdan Todoro v. Marko tarlasına ve bir tarafdan Dimitri v. Todoro tarlasına ve bir tarafdan cebele müntehî ve mahdûd tahmînen diyârımız keyli ile bir buçuk keyl tohum istî‘âb eder taht-ı tasarrufumda olan bir kıt‘a tarlanın hakk-ı tasarrufunu sâhib-i arz ma‘rifetiyle merkūm Dimo’ya tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan bin dokuz yüz nakd-i fıddî-i Osmânî râyic fi’l-vakt akçeyi merkūm Dimo yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bir kıt‘a tarlanın hakk-ı tasarrufu merkūm Dimo’nundur sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Dimo vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Şuhûdü’l-hâl: Kābil b. Abdullah, Ali b. Abdullah, Perviz b. Abdullah, Mustafa b. Mehmed, Nikola v. Dimitri, Dimitri v. Kondi, Dimitri v. Yorgi, Franko v. Yorgi, Nikola v. ( ) ve gayruhüm.