Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 267 Hüküm no: 305 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Angelo’nun bağlarını İstemad v. Yani’ye satması Vilâyet-i Rumeli’nde Mora sancağında Kartina kazâsına tâbi‘ İstemniçe nâm karyeden Yani v. Angelo nâm zimmî meclis-i şer‘de hâmilü’l-kitâb İstemad v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme bağları sınırında vâki‘ bir tarafdan Pavlo v. ( ) bağına ve bir tarafdan Yorgo v. Parti bağına ve bir tarafdan Polenceroni v. Yorgi bağına ve bir tarafdan İlya v. ( ) bağına müntehî ve mahdûd olup ve yine karye-i merkūme sınırı dâhilinde vâki‘ bir tarafdan Yorgo v. Salaryo bağına ve bir tarafdan Polenceroni v. Hristatli bağına ve bir tarafdan Trandafil v. ( ) bağına ve bir tarafdan Kostantin v. ( ) bağına müntehî ve mahdûd iki kıt‘a mülk bağlarımı cümle-i tevâbi‘ ve levâhıkı ve kâffe-i menâfi‘ ve merâfıkları ile bi safkatin vâhidetin mezbûre İstemad’a bin iki yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen ettiğimden sonra mebî‘ât-ı mezkûrâtı mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ler mesfûr İstemad’ın mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mâ hüve’l-vâki‘ bi’t-taleb ketb olundu. Hurrire fî 26 min Recebi’l-ferd li’s-seneti’l-merkūme. Şuhûdü’l-hâl: Ali b. Abdullah, Yakub b. Kurd, Perviz b. Abdullah, Mustafa b. Mehmed, Yani [v.] Yorgi, Nikola [v.] Siraklo, Panayot [v.] Yorgi, Zafiri [v.] Yani, Soroki [v.] Yani, Lambro v. Yorgi, Polenceroni v. Yorgi, Yorgi v. Angelo ve gayruhüm mine’l-hâzırîn.