Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 271 Hüküm no: 313 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye Hâtun bt. Kasım’ın evini Ali Ağa b. Abdülmennân’a satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Kasımpaşa mahallesi sâkinlerinden Râziye Hâtun bt. Kasım meclis-i şer‘-i hatîr-i lâzımü’t-tevkīrde işbu hâmilü’l-kitâb fahrü’l-akrân Ali Ağa b. Abdülmennân mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan ba‘zan suyolcu Yusuf Bey b. Abdullah mülküne ve ba‘zan Ferhad Bey’in mülküne ve bir tarafdan müşterî-i mûmâ-ileyh Ali Ağa mülküne ve ba‘zan bir tarafdan benim mülküme müntehî ve bir tarafdan yine müşterî-i mezbûr mülküne ve bir tarafdan tarîk-i âma müntehî olup bir tahtânî beyti ve sofayı ve zât-ı eşcâr-ı müsmire ve gayr-ı müsmireyi hâvî [ve] cüneyneyi hâvî mülk menzilimi bi cümle tevâbi‘ ve levâhıkı ve kâffe-i menâfi‘ ve merâfıkı ile mûmâ-ileyh Ali Ağa’ya yirmi beş bin nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd-ı mezkûr Ali Ağa’nın mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırra-i mezbûrenin vech-i mübeyyen üzre hâvî olan ikrâr ve takrîrin el-mukarru lehü’l-mezbûr Ali Ağa vicâhen ve şifâhen tahkīk ve tasdîk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâdî min Şa‘bâni’l-mu‘azzam li’s-seneti’l-merkūme. Şuhûdü’l-hâl: Abdürrahim Çelebi b. Habib el-İmâm, Receb Efendi b. Ömer el-İmâm, Hasan Halîfe b. Abdi el-İmâm, el-Hâc Ahmed b. Hüseyin el-Müezzin, Mehmed Beşe Suyolcu, Davud Halîfe b. Mehmed el-Müezzin, Mustafa b. Hasan el-Câbî, Emrullah b. Ali el-Kayyım, Mustafa b. Mehmed, Ömer Beşe b. ( ) Suyolcu ve gayruhüm mine’l-hâzırîn.