Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 272 Hüküm no: 314 Orijinal metin no: [47a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hâtun bt. İbrahim’in, kocası Pîrî Bey’in Mustafa b. Halil’de olan alacağını kocasının alacaklısı İsmail b. İbrahim’in terekesinden alması Mahmiye-i Kostantıniyye’de Karagümrük kurbunda Ali Paşa mahallesi sâkinelerinden Râbia Hâtun bt. İbrahim tarafından husûs-ı âti’l-beyânı da‘vâ ve talebe vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î şer‘an sâbit ve mütehakkik olan Hüseyin b. Şaban nâm kimesne meclis-i şer‘-i hatîr-i lâzımü’t-tevkīrde Havâss-ı Aliyye kazâsı müzâfâtından Terkos nâhiyesine tâbi‘ Kara Halil nâm karyeden Mustafa b. Halil nâm kimesne üzerine takrîr-i da‘vâ edip bundan akdem müvekkilem mezbûre Râbia’nın zevci olup tarîk-i hacda fevt olan Pîrî Bey b. Mahmud nâm kimesne yediyle verilmiş karye-i merkūmede sâkin iken fevt olan İsmail b. İbrahim zimmetinde deyn-i şer‘îden yirmi iki bin nakd-i fıddî-i Osmânî râyic fi’l-vakt akçe hakkı olup mezbûr İsmail müteveffâ olmağla zimmetinde bâkī kalmışdı hâlâ meblağ-ı mezbûru müteveffâ-yı merkūmun merkūm Mustafa muhallefâtına vâzı‘u’l-yed olup usûbet-i nesebiyye cihetinden vâris olduğu ecilden müvekkilem mezbûre Râbia’nın hakkı suâl olunup inde’ş-şer‘i’ş-şerîf müteveffâ-yı mezbûrun muhallefâtından tahlîs olunmak matlûbumdur dedikde gıbbe’s-suâl mezbûr Mustafa [cevâbında], husûs-ı mezbûr minvâl-i muharrer üzre olduğunu bi’l-külliyye inkâr edicek müdde‘î-i mezbûrdan sıdk-ı kelâmını mübeyyine beyyine taleb olundukda udûl-i müslimînden Ahmed Bey b. Musa ve Şaban b. Hüseyin nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ bundan akdem tarîk-i hacc-ı şerîfde fevt olup mezbûre Râbia’nın zevci olan merkūm Pîrî Bey Kâ‘be-i Mükerreme’ye teveccüh ve azîmet eylediğinde [47b] bizi meclisine ihzâr edip müteveffâ-yı mezbûr İsmail dahi ol meclisde hâzır idi merkūm Pîrî Bey şöyle takrîr-i kelâm eyledi ki işbu hâzır bi’l-meclis olan İsmail zimmetinde deyn-i şer‘îden yirmi iki bin akçe hakkım vardır ve lâkin meblağ-ı mezbûr yirmi bin akçe zevcem Râbia nâm hâtunundur deyû müteveffâ-yı mezbûr İsmail muvâcehesinde bizi istişhâd edip ol dahi tasdîk eyledi idi bu husûsa minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde mezbûrânın şehâdetleri hayyiz-i kabûl ve mahall-i irtizâda vâki‘ oldukdan sonra mezbûre Râbia müteveffâ-yı mezbûr zimmetinde olan meblağ-ı mezbûr yirmi iki bin akçeden müteveffâ-yı mezbûrdan hâl-i hayâtında ve kemâl-i sıhhatinde küllen ve ba‘zan bir akçe ve bir habbe ahz ve kabz etmeyip ve vücûh-ı şer‘iyyeden bir vechile müteveffâ-yı mezbûr İsmail’in zimmetini ibrâ ve iskāt etmediğine yemîn teklîf olundukda ol dahi bi hasebi vefki’l-mes’ûl yemîn billâhi’l-aliyyi’l-a‘lâ ettikden sonra meblağ-ı mezbûr müteveffâ-yı merkūmun muhallefâtından hükm olunup işbu vesîka alâ mâ hüve’l-hakīka ketb ve imlâ olundu. Hurrire fî selhi Recebi’l-ferd li sene tis‘a ve ışrîn ve elf. Şuhûdü’l-hâl: Murtaza Efendi b. Zülfikār, Ramazan Efendi b. eş-Şeyh Süleyman, Mehmed Bey b. ( ) er-Râcil, Hızır b. ( ) er-Râcil, Yakub b. Kurd, Mehmed b. Mehmed, Mustafa b. Mehmed, Perviz b. Abdullah ve gayruhüm mine’l-hâzırîn.