Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 273 Hüküm no: 315 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Toroso v. Rizo’nun eski ortağı Dimo v. Yani’deki hakkını aldığı Kasab tâifesinden Toroso v. Rizo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Dimo v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip bundan akdem mezbûr Dimo ile kasablık san‘atında şerîkler olup ba‘de külli hesâb mezbûr Dimo zimmetinde dört bin nakd-i fıddî-i Osmânî râyic fi’l-vakt akçe hakkım zuhûr etmeğin hâlâ meblağ-ı mezbûr dört bin nakd-i mezbûrü’n-na‘t akçeyi merkūm Dimo yedinden bi’t-tamâm ve’l-kemâl ahz ve kabz eyledim ba‘de’l-yevm husûs-ı mezbûra müte‘allik mezbûr Dimo ile da‘vâ ve nizâ‘ım yokdur dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Dimo vicâhen ve şifâhen tasdîk ve tahkīk edicek mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’s-sânî min Şa‘bân li târihi’l-mezbûr. Şuhûdü’l-hâl: Mahmud b. Abdullah, Süleyman b. Turgud, Ali b. Abdullah, Mustafa b. Mehmed, Tolo v. İstirani, Nikola v. Dimo, İstemo v. Dimitri, Tolo v. Yani.