Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 277 Hüküm no: 321 Orijinal metin no: [48b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kolo v. Kiryaki’nin evi ve bağlarını Koço v. Nika’ya satması Vilâyet-i Rumeli’nde Avlonya sancağında Depedelen kazâsına tâbi‘ Kakoz nâm karyeden Kolo v. Kiryaki nâm zimmî meclis-i şer‘de hâmilü’l-kitâb Koço v. Nika nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Kona v. Kolah mülküne ve bir tarafdan Kolo v. Dado mülküne ve bir tarafdan Koço v. Dado mülküne ve bir tarafdan Göka v. Dimo mülküne müntehî olun bir tahtânî beyti ve samanlık ve zât-ı eşcâr-ı müsmire ve gayr-ı müsmireyi hâvî muhavvatası müştemil mülk menzilimi ve yine karye-i merkūme bağları dâhilinde vâki‘ her biri lede’l-ahâlî ve’l-cîrân ma‘lûmü’l-hudûd iki kıt‘a mülk bağlarımı cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûr Koço’ya dört bin altı yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen ve teslîm-i müsemmen eyledikden sonra zikr olunan mebî‘leri mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ler mezkûr Koço’nun mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîri el-mukarru lehü’l-mezbûr Koço bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî 10 min Şa‘bâni’l-mu‘azzam li sene 1029. Şuhûdü’l-hâl: Mustafa b. Mehmed, Ali b. Abdullah, Kirko v. Kini, Foti [v.] Kini, Kosta v. Kondi, Koli v. Andriye, Yagob Meyhâneci ve gayruhüm mine’l-hâzırîn.