Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 277 Hüküm no: 322 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Hristo ile Harido v. Apostol arasındaki değirmen anlaşmazlığının sulhle sonuçlanması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Kariça nâm karye sâkinlerinden Andriye v. Hristo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Harido v. Apostol nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip bundan akdem karye-i merkūmede [hâlike] olan anam İstemona nâm nasrâniyenin Polgamid nâm karye sınırında vâki‘ Nifrobili suyu demekle [ma‘rûf] suda dâyir olan bir göz mülk değirmenine merkūm Harido vâzı‘u’l-yed olup anam mezbûre hâlike olmağla verâseti bana münhasıra olmağın mezkûr değirmeni merkūm Harido’dan da‘vâ ve taleb edip ol dahi hâlike-i merkūmeden hâl-i hayâtında iştirâ eyledim demeğin beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimize muslihûn tavassut edip es-sulhu seyyidü’l-ahkâm fehvâsınca dört bin nakd-i fıddî-i Osmânî râyic fi’l-vakt akçe üzre akd-i sulh inşâ ettiklerinde ben dahi sulh-i mezbûru kabûl ve bedel-i sulh olan dört bin akçeyi merkūm Harido yedinden bi’t-tamâm ve’l-kemâl ahz ve kabz edip husûs-ı mezbûra müte‘allik da‘vâ ve nizâ‘dan merkūm Harido’nun zimmetini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Harido vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Şa‘bâni’l-mu‘azzam li sene tis‘a ve ışrîn ve elf. Şuhûdü’l-hâl: Yani v. Kasato, Panayot v. Dimitri, Dimo v. Yani, Armağan v. Apostol, Yani v. Nidro, İskarlet v. Simo, Kirici v. Hristatli, Panayot v. Pavlo, Armağa[n] Hallâc, Anderon Papas, İstefani v. Anderon.