Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 278 Hüküm no: 323 Orijinal metin no: [49a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Ahmed’in Eyüp’teki evini Ali Çelebi b. Mehmed’e satması Mahmiye-i Kostantıniyye -humiyet ani’l-âfât ve’l-beliyye- mahallâtından Saraçhâne kurbunda Mi‘mâr Ayas mahallesi sâkinelerinden fahrü’l-muhadderât, zahrü’l-muvakkarât Ayşe Hâtun bt. Ahmed tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Mahmud Efendi b. Yusuf ve Mehmed Efendi b. İbrahim şehâdetleri ile şer‘an sâbite olan zevci Sâlih Bey b. Mehmed nâm kimesne meclis-i şer‘-i hatîr-i lâzımü’t-tevkīrde işbu hâfızü’l-kitâb Ali Çelebi b. Mehmed es-Sarrâcü’s-sultânî mahzarında bi’l-vekâle ikrâr ve takrîr-i kelâm edip işbu akdin sudûruna değin müvekkilem mezbûre Ayşe’nin silk-i mülk-i sahîhinde münselik ve münharıt olup medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Câmi‘-i Kebîr mahallesinde vâki‘ bir tarafdan Emin Efendi vakfı’na ve bir tarafdan Mirza vakfı’na ve bir tarafdan Sefer Hâce vakfı’na ve bir tarafdan tarîk-i âma müntehî ve mahdûd olup iki bâb fevkānî ve bir bâb tahtânî beyti ve harâbe damı ve ahırı müştemil mülk menzilini cümle-i tevâbi‘ ve levâhıkı ve kâffe-i menâfi‘ ve merâfıkı ile mûmâ-ileyh Ali Çelebi’ye otuz üç bin nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd mezkûr Ali Çelebi’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde müvekkil-i mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Ali Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer min Şa‘bâni’l-mu‘azzam li sene 1029. Şuhûdü’l-hâl: Bayram Efendi b. Şükrullah el-Hatîbü câmi‘i’l-merhûm Zal Mahmud Paşa, Mehmed b. Abdürrahim el-İmâm, Hasan Bey b. Yusuf el-Cündî İsmail Bey b. Hasan el-Yesârî, Ebûbekir Efendi b. Abdülkādir, Mehmed Efendi b. Hayreddin, Es-Seyyid Mustafa b. es-Seyyid Zeynelabidin, İbrahim b. Musa ed-Dellâl, Mustafa b. Mehmed el-Muhzır, Ali b. Abdullah, Hasan b. Ramazan ve gayruhüm mine’l-hâzırîn.