Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 279 Hüküm no: 324 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pavlo v. Todori’nin Avasya köyündeki bağını Yani v. Dimitri’ye satması Havâss-ı Aliyye kazâsı tevâbi‘inden Avasya nâm karye sâkinlerinden Pavlo v. Todori nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Yani v. Dimitri nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında vâki‘ bir tarafdan Yani v. Miles bağına ve bir tarafdan deveci Apostol tarlasına ve bir tarafdan Abacıyân bağına ve bir tarafdan tarîk-i âma müntehî olup tahmînen yirmi beş ırgadlık bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Yani’ye sekiz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen ve teslîm-i müsemmen kıldım ba‘de’l-yevm sâlifü’l-beyân bağ-ı mahdûd mezkûr Yani’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun [49b] vech-i mübeyyen üzre cârî olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’t-tâsi‘ min Şa‘bâni’l-mu‘azzam li’s-seneti’l-merkūme. Şuhûdü’l-hâl: Mustafa b. Abdullah, Ali b. Abdullah, Mustafa b. Mehmed, Perviz b. Abdullah ve Yani [v.] Manol, Papa [v.] Aleksi, Yorgaki [v.] Dimitri, Yani v. Gülühar?, Tolo [v.] İspilyot, Yakomi [v.] Apostol ve gayruhüm mine’l-hâzırîn.