Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 279 Hüküm no: 325 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiroş v. Marti’nin Ergirikasrı’ndaki bostan yerini Kini v. Kiryaki’ye satması Vilâyet-i Rumeli’nde Avlonya sancağında Ergirikasrı kazâsına tâbi‘ Horiştan nâm karye sâkinlerinden Kiroş v. Marti nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Kini v. Kiryaki nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Kiro v. Andriye mülküne ve bir tarafdan Lalos v. Kiro mülküne ve bir tarafdan Marto v. Nika ve bir tarafdan Luka v. Köni mülküne müntehî ve mahdûd bir tahtânî beyti ve zât-ı eşcâr-ı müsmire ve gayr-ı müsmireyi hâvî bostan yerini müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Kini’ye sekiz bin yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘-i mezkûrun mahallinde kabzına müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Kini’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Kini vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min Şa‘bâni’l-mu‘azzam li sene tis‘a ve ışrîn ve elf. Şuhûdü’l-hâl: Perviz b. Abdullah, Ali b. Abdullah, Mustafa b. Mehmed, Yakub b. Kurd, Simo v. Dimo, Toka v. Martiri, Petro v. Kini, Kiroş v. Nika, Peyço v. Martiri, Petro v. Tano, Dimo Papa, Layoç v. Kiro, Şiro v. Laska.