Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 280 Hüküm no: 326 Orijinal metin no: [49b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gümrük emini Murad Ağa b. Abdürrahim’in Mehmed Bey’den dalyan rüsûmunu alması Bi’l-fi‘l gümrük emîni olan Murad Ağa b. Abdürrahim tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Piyâle Bey b. Abdullah ve Yusuf Bey b. Abdullah nâm cündîler şehâdetleri ile şer‘an sâbite olan fahrü’l-akrân Balık emîni Mehmed Çavuş b. Abdullah meclis-i şer‘de hâmilü’l-kitâb Mehmed Bey nâm korucu mahzarında bi’l-vekâle ikrâr ve takrîr-i kelâm edip müvekkil-i mezbûr Murad Ağa’nın taht-ı iltizâmında vâki‘ Havâss-ı Aliyye kazâsı müzâfâtından Küçük Çekmece ve Ayastefanos’da vâki‘ olan dalyanlarının bin yirmi dokuz senesi Şa‘bânı’nın gurresinden sene tamâmına değin rüsûmunu mezbûr Mehmed Bey’e otuz bin nakd-i fıddî-i Osmânî râyic fi’l-vakt akçeye der-uhde edip meblağ-ı mezbûr otuz bin akçenin on iki bin akçesini Piyâle Bey yedinden ve on sekiz bin akçesini merkūm Mehmed Bey yedinden mîrî için bi’t-tamâm ve’l-kemâl ahz ve kabz eyledim ba‘de’l-yevm meblağ-ı mezbûrdan merkūm Mehmed Bey zimmetinde bir akçe ve bir habbe bâkī kalmadı dedikde mukırr-ı mezbûrun bi’l-vekâle cârî olan ikrârını el-mukarru lehü’l-mezbûr Mehmed Bey vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî evâsıtı Şa‘bâni’l-mu‘azzam li târihi’l-mezbûr. Şuhûdü’l-hâl: İbrahim Çavuş b. Mustafa, Hüsrev Bey b. Abdullah el-Bevvâbü’s-sultânî, Yusuf b. Hamza, Mehmed Beşe b. Abdullah er-Râcil, Bâli Beşe b. Abdullah el-Acemî, Yusuf Bey b. Abdullah el-Bevvâbü’s-sultânî, Ahmed Bey b. Abdullah, Hasan Beşe b. Abdullah er-Râcil, Ferruh b. Abdullah er-Râcil, Perviz b. Abdullah, Mustafa b. Mehmed, Hüseyin b. Ali ve gayruhüm mine’l-hâzırîn.