Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 281 Hüküm no: 327 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Niko’nun fırın hissesini Yorgo v. Dimo’ya satması Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Yenikapı kurbunda vâki‘ Odabaşı mahallesi sâkinlerinden Yorgo v. Niko nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yorgo v. Dimo nâm zimmî mahzarında bi’t-tav‘ ikrâr edip mahalle-i mezbûrede vâki‘ bir tarafdan vakıf odalara ve bir tarafdan merhûm Odabaşı câmi‘-i şerîfine ve iki tarafdan tarîk-i âma müntehî olup Kara Çepnizâde vakfı’ndan icâre-i mu‘accele ve müeccele ile mutasarrıf olduğum ekmekçi fırınından olan rub‘ hisse-i şâyi‘amın hakk-ı tasarrufunu sâhib-i arz ma‘rifetiyle merkūm Yorgo’ya tefvîz edip ol dahi minvâl-i muharrer üzre tefevvüz ve kabûl eylediklerinden sonra mukābele-i tefvîzde olan on sekiz bin nakid akçeyi merkūm Niko yedinden ahz ve kabz eyledim dedikde mukırr-ı mezbûrun ikrârını el-mukarru lehü’l-mezbûr Yorgo vicâhen tasdîk edicek gıbbe’t-taleb ketb olundu. Hurrire fi’l-yevmi’s-sâdis aşer li târihi’l-mezbûr. Şuhûdü’l-hâl: Mehmed b. Abdullah, Mustafa b. Mehmed, Perviz b. Abdullah, Ali b. Abdullah, Hristo v. Yani, Niko v. Yorgo, Dimo v. Hristo, Mino v. Nika, Deriçe v. Dedo, Yorgo v. Yani ve gayruhüm.