Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 281 Hüküm no: 328 Orijinal metin no: [50a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani ve Aleksi v. Anderon’un kışlak, ağıl ve çayırların tasarrufunu Ali Çelebi b. Mehmed’e vermeleri Havâss-ı Sultâniyye kazâsı müzâfâtından Terkos nâhiyesinde vâki‘ merhûm ve mağfûrun-leh Ebü’l-feth Sultan Mehmed Hân -tâbe serâhu- hazretlerinin arâzi-i mevkūfesi mukāta‘asına ber vech-i iltizâm emîn olan Yorgi v. Yani ve Aleksi v. Anderon nâm zimmîler meclis-i şer‘de işbu hâfızü’l-kitâb fahrü’l-akrân Dîvân-ı hümâyûn kâtiblerinden Ali Çelebi b. Mehmed mahzarında her biri takrîr-i kelâm edip zikr olunan nefs-i nâhiye-i Terkos sınırında vâki‘ merhûm-ı mûmâ-[ileyh] hazretlerinin arâzi-i mevkūfesinden olup inde’l-ahâlî ma‘lûmü’l-hudûd olan koyun kışlağını içinde olan ağılı ile ve kezâlik inde’l-ahâlî ma‘lûmü’l-hudûd olup tahmînen üç araba otlak hâsıl olur iki kıt‘a çayır yerlerin mutasarrıfân olan Abdurrahman Efendi ve Ömer Efendi nâm kimesneler fevt olup evlâd-ı zükûrları olmamağla zikirleri sebk eden kışlak ve ağıl ve çayırları tapuya müstahık olduğu cihetden emânet-i mahkiyem hasebiyle zikr olunan kışlak ve ağıl ve çayırların hakk-ı tasarruflarını mûmâ-ileyh Ali Çelebi’ye tefvîz edip on beş bin nakid akçe resm-i tapusun vakf-ı mezbûr için bi’t-tamâm ve’l-kemâl mûmâ-ileyh Ali Çelebi yedinden bi’t-tamâm ahz ve kabz eyledik dediklerinde mukırrân-ı mezbûrânın vech-i mübeyyen üzre cârî olan ikrâr ve takrîrlerini el-mukarru lehü’l-mezbûr Ali Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 17 min Şa‘bâni’l-mu‘azzam li sene 1029. Şuhûdü’l-hâl: Mehmed Ağa b. Mahmud Kethüdâ-yı Kiler-i âmire, Yakub b. Kurd, Ebûbekir Bey b. Hamza el-Kilârî, Ahmed Bey b. ( ) el-Bevvâbü’s-sultânî, Hüseyin Bey b. Süleyman el-Kilârî, Mustafa Bey b. ( ) el-Bevvâbü’s-sultânî, Hasan b. Ahmed, Mustafa b. Mehmed el-Muhzır, Ali b. Abdullah el-Muhzır ve gayruhüm mine’l-hâzırîn.