Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 282 Hüküm no: 329 Orijinal metin no: [50a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcuların kasaplardan iç yağı alımı ve mum satış bedelleri Mâ fîhî kemâ fîh Harrerehû el-abdü’l-fakīr Şeyh Mehmed b. Mustafa el-müvellâ bi medîneti Kostantıniyye hilâfeten Mahmiye-i İstanbul’da Edirnekapısı hâricinde vâki‘ mumcu tâifesinin bi’l-fi‘l kethüdâsı Mehmed Bey b. Haydar ve yiğidbaşısı olan Nikola v. Yani ve neferlerinden Paroş v. Andriye ve Kosta v. Pankarati ve Yorgi v. Andriye nâm kimesneler mahfil-i kazâda hâlâ selhânede kasablar kethüdâsı olan Ahmed Bey b. Mahmud ve yiğidbaşısı olan es-Seyyid Mehmed b. Hasan ve kasablardan Musa Bey b. Ali ve Yusuf b. Abdullah ve Ahmed Bey b. Abdülmennân ve yahud kasablarının kethüdâsı olan İbrahim Beşe b. Abdullah ve yiğidbaşısı olan Kolon v. Yako ve kasablardan Yako v. David ve Yasef v. Salamon ve Salamon v. İsrâil nâm kimesneler mahzarlarında takrîr-i kelâm ve bast-ı mukaddemât murâd edip kadîmü’l-eyyâmdan kasablar selhânede zebh ettikleri sığırdan hâsıl olan iç yağını narh-ı rûzî üzre bize vermek mu‘tâd olmağın zebh ettikleri sığırın her sene bize verdikleri iç yağının bahâsını kat‘ edip tescîl ettirmek mu‘tâdımız olmağın işbu sâl-i ferhunde-fâlda dahi bügrek yağını çıkarmak üzre min ba‘d her vakıyyesi sekizer akçeye vermeğe ve biz dahi Yeniçeri meydanına yirmi dirhem ve sofrasına yirmi iki dirhem ve çarşıya on sekiz dirhem bir akçeye mum vermek üzre akd-i ittifâk ve şedd-i visâk eyledik dediklerinde tâife-i mezbûreyi kelâm-ı meşrûhlarında mezkûrûn kasablar dahi tasdîk ve tahkīk eylediklerinde mâ vaka‘a alâ vukū‘ihî bi’t-taleb ketb olundu. Hurrire fî evâhiri şehri Recebi’l-ferd li târihi’l-mezbûr. Şuhûdü’l-hâl: Mahmud Çelebi b. Bâli, Sinan b. Abdullah, Hanefi b. Abdullah, Halil b. Hüseyin, İbrahim b. Abdullah, üstâd Mehmed b. Hüseyin, Mustafa b. Abdullah, Hanefi b. Ali ve gayruhüm mine’l-hâzırîn.