Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 283 Hüküm no: 330 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Toyça v. Dado’nun Vaniste tarlalarının tasarruf hakkını Mino v. Nika’ya devri Vilâyet-i Rumeli’nde Avlonya sancağında Ergirikasrı kazâsına tâbi‘ Vaniste nâm karye sâkinlerinden Toyça v. Dado nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Mino v. Nika nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında bir kıt‘ası Parse ve bir kıt‘ası dahi Miseniso demekle ma‘rûf mevzi‘lerde vâki‘ lede’l-ahâlî ve’l-cîrân ma‘lûmü’l-hudûd mutasarrıf olduğum iki kıt‘a tarlanın hakk-ı tasarrufunu sâhib-i arz ma‘rifetiyle mezbûr Mino’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan üç bin beş yüz nakd-i fıddî-i Osmânî râyic fi’l-vakt akçeyi mezbûr Mino yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân tarlaların hakk-ı tasarrufu mersûmundur sâir emsâli tasarrufu gibi keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Mino bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min Şa‘bâni’l-mu‘azzam li sene tis‘a ve ışrîn ve elf. Şuhûdü’l-hâl: Mustafa b. Mehmed el-Muhzır, Ali b. Abdullah el-Muhzır, Hristo [v.] Yani, Yorgo [v.] Yani, Yorgo [v.] Dimo, Mojakim v. ( ), Hristo v. Dimo, Nikola v. Yorgo ve gayruhüm mine’l-hâzırîn.