Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 283 Hüküm no: 331 Orijinal metin no: [50b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Preşkova bt. Kino’nun Kirko v. Duka ile evlenmesi Vilâyet-i Rumeli’nde Avlonya sancağında Ergirikasrı kazâsına tâbi‘ Piskopi nâm karye sâkinlerinden Preşkova bt. Kino nâm nasrâniye tarafından husûs-ı âti’l-beyâna vekîl olup vekâleti hasm-ı şer‘î-i câhid mahzarında kazâ-i mezbûre müzâfâtından Tarahat? nâm karye sâkinlerinden Dimo v. Kiro ve Nika v. Pando nâm zimmîler şehâdetleri ile şer‘an sâbit olan merkūme Preşkova’nın ammisi Todori v. Köni nâm zimmî meclis-i şer‘de işbu hâmil-i hâze’l-kitâb karye-i merkūme Tarahat sâkinlerinden Kirko v. Duka nâm zimmî mahzarında bi’l-vekâle ikrâr ve takrîr-i kelâm edip müvekkilem mezbûre Preşkova’yı mezbûr Kirko’ya üç bin beş yüz akçe mehr-i müeccel üzre akd-i nikâh ve tezvîc eyledim dedikde mezbûr Kirko dahi meblağ-ı mezbûr üç bin beş yüz akçe mehr-i müeccel ile tezevvüc ve kabûl eyledim dedikden sonra mâ hüve’l-vâki‘ alâ vukū‘ihî bi’t-taleb ketb olundu. Hurrire fi’l-yevmi’s-sâbi‘ aşer li târihi’l-mezbûr. Şuhûdü’l-hâl: Yorgi v. Mankoli, Nika v. Panko, Dimo v. Kiro, Koma v. Yorgi, Duka v. Diro, Dimo v. Kino, Dino v. Koma ve gayruhüm mine’l-hâzırîn.