Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 183 Hüküm no: 154 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. İbrahim’in eski kocası Eyüb b. Ali’den çocuklarının nafaka alacağını sulh yolu ile taksite bağladığı Mahmiye-i İstanbul’da Molla Aşkī mahallesinde sâkine işbu bâ‘isetü’l-kitâb Sâliha bt. İbrahim nâm hâtun meclis-i şer‘-i hatîr-i lâzımü’t-tevkīrde sâbıkan zevci olan Eyüb b. Ali’nin hâlâ zevcesi ve tarafından husûs-ı âti’l-beyâna vekîl olup es-Seyyid Mehmed Çavuş b. es-Seyyid Mehmed ve Ebûbekir b. Mustafa nâm kimesneler şehâdetleri ile şer‘an vekâleti sâbite olan Fâtıma nâm hâtun mahzarında ikrâr ve takrîr-i kelâm edip müvekkil-i mezbûrun firâşından hâsıl olan oğlum Mehmed’in ve kızım Hâmide’nin nafakaları için târih-i kitâbdan seksen ay mukaddem hâkime yevmî altışar buçuk akçe nafaka takdîr ettirip yedime hüccet-i şer‘iyye verildikde cem‘an seksen ayda müctemi‘ olan on beş bin altı yüz akçenin bin altı yüz akçesini bir def‘a ve altı yüz akçesini bir def‘a ve üç bin üç yüz akçesini bir def‘a cem‘an beş bin beş yüz akçesini müvekkil-i mezbûr Eyüb yedinden ahz u kabz edip bâkī on bin yüz akçesi zimmetinde kalmağla meblağ-ı bâkī-i mezbûru merkūm Eyüb’den bundan akdem taleb ve da‘vâ eylediğimde beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip mezbûr Eyüb ile beynimizde dokuz bin akçe üzerine inşâ-i akd-i sulh eylediklerinde ben dahi sulh-i mezbûru kabûl eyledikden sonra mezbûr Eyüb bedel-i sulh olan meblağ-ı mezbûru def‘aten edâya iktidârı olmayıp taksîte tâlib olmağın târih-i kitâbdan yirmi ay tamâmına değin her otuz gün tamâmında dörder yüz ellişer akçe verip edâ etmek üzre taksît edip hukūk-ı zevciyyete müte‘allika da‘vâdan mezbûr Eyüb’ün zimmetini ibrâ eyledim dedikde gıbbe’t-tasdîk mezbûre Fâtıma meblağ-ı mukassat-ı mezbûra kefîl olmağın mâ vaka‘a bi’t-taleb ketb olundu. Fi’l-yevmi’s-sâlis min Cemâziyelevvel li sene seb‘a ve seb‘în ve elf Şuhûdü’l-hâl: Abdülkādir Ağa, Derviş Çavuş b. ( ), Mehmed Çavuş b. ( ), Ebûbekir Çavuş, diğer Mehmed Çavuş.