Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 184 Hüküm no: 155 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mısır’dan gelirken yolda vefat eden el-Hâc Yusuf adlı tüccarın malının vârislerine teslim edildiği Fi’l-asl mahmiye-i İstanbul’da Rüstem Paşa mahallesi sükkânından olup bundan akdem diyâr-ı Mısır’da ticâret üzre iken İstanbul’a gelir iken esnâ-i tarîkde vilâyet-i Anadolu’da Burdur kazâsına tâbi‘ Eski İkiz? nâm karyede vefât eden el-Hâc Yusuf b. Abdullah’ın zevce-i menkûha-i metrûkesi ve sulbî sagīr oğlu Mehmed’in kıbel-i şer‘-i enverden mansûbe vasîsi olan Fâtıma bt. Hasan nâm hâtun meclis-i şer‘de Ali Beşe b. Mehmed mahzarında asâleten ve vesâyeten ikrâr ve takrîr-i kelâm edip merkūm Hacı Yusuf vech-i meşrûh üzre karye-i mezbûrede vefât eyledikde Gelendos voyvodası olup Hamid sancağında vâki‘ olan beytülmâli kabza memûr olan Mirza Ali Ağa nâm kimesnenin vekîli olan Ahmed Bey nâm kimesne mezbûr Hacı Yusuf’un zâhirde vâris-i ma‘rûfu olmamak zu‘mu ile terekesini bi’l-emâne kabz etmekle mukaddemâ mezbûr Ali Beşe’yi emîn-i mezkûrdan makbûzu olan terekeyi da‘vâ ve taleb ve ahz u kabza ve bana îsâle ve ahz ve îsâl mütevakkıf olduğu umûrun küllîsine tarafımdan vekîl ve menâbıma nâib nasb ve ta‘yîn edip ol dahi ba‘de kabûli’l-vekâle varıp ber mûceb-i defter-i kassâm emîn-i mezkûrun yedinde mevcûd olup müteveffâ-yı mezbûr Hacı Yusuf’un terekesi olan dört yüz on sekiz vakıyye keten ve üç yüz elli vakıyye aspur çiçeğini emîn-i mezkûr yedinden bi’l-vekâle ahz u kabz edip yedinde olan defter mûcebince getirip bana teslîm ben dahi asâleten ve vesâyeten tesellüm ve kabz eyledim min ba‘d eşyâ-i mezkûreden vekîl-i mezbûrun yedinde bir şey kalmamışdır dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis min Cemâziyelevvel li sene seb‘a ve seb‘în ve elf. Şuhûdü’l-hâl: Ahmed Beşe b. Mehmed, Osman Beşe b. Davud, Mahmud b. Murad, Hasan b. İhsan.