Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 287 Hüküm no: 337 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Mehmed’in Trapoliçe kazâsındaki bağını Andriye’nin çocukları Panayota ve Kalamire’ye satması Vilâyet-i Rumeli’nde Mora sancağında nefs-i kazâ-i Trapoliçe sükkânından fahrü’l-akrân Ali Bey b. Mehmed nâm kimesne meclis-i şer‘-i hatîr-i lâzımü’t-tevkīrde işbu hâmilânü’l-kitâb Panayota ve Kalamire bintey Andriye nâm sagīrelere kıbel-i şer‘den mansûb vasiyy-i şer‘îleri olan Yorgo v. Yanaki nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip kazâ-i mezbûr kurbunda Karvon nâm mevzi‘de vâki‘ bir tarafdan Todori v. ( ) bağına ve bir tarafdan Nikola v. Mihal bağına ve bir tarafdan Kosta v. ( ) bağına ve bir tarafdan vâdiye müntehî ve mahdûd olup tahmînen yirmi iki dönüm bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile sagīrân-ı mezbûretâna kırk bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza vesâyet-i mahkiyesi hasebiyle mezbûr Yorgo’yu taslît eyledim ba‘de’l-yevm sâlifü’l-beyân bağ-ı mahdûd sagīretânın mülk-i müşterâ-yı sarîhleridir keyfe mâ yeşâân mutasarrıf olsun[lar] dedikde mukırr-ı mezbûrun vech-i mübeyyen üzre cârî olan ikrâr ve takrîrini vasiyy-i mezbûr Yorgo bi’l-vesâye tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fî 21 min Şa‘bâni’l-mu‘azzam li sene 1029. Şuhûdü’l-hâl: Mustafa Çavuş b. Mehmed, fahrü’l-akrân Hüseyin Ağa b. Piyâle el-Müteferrika, Ali Çelebi b. Hüseyin, Mehmed Çelebi b. Yusuf, Mahmud Bey b. Hürrem, Bâli Beşe b. Süleyman er-Râcil, Mustafa b. Mehmed el-Muhzır, Ali b. Abdullah el-Muhzır, Perviz b. Abdullah el-Muhzır ve gayruhüm mine’l-hâzırîn.