Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 288 Hüküm no: 339 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Medîne bt. Sefer’in Eyüp’teki evini Mehmed b. Abdullah’a satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Çavuş Kasım mahallesi sâkinlerinden Medîne bt. Sefer nâm hâtun meclis-i şer‘de işbu hâmil-i hâze’l-kitâb Mehmed b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Süleyman Bey b. ( ) mülküne ve bir tarafdan Mustafa b. ( ) mülküne ve bir tarafdan Zıhgircizâde Mehmed Çelebi mülküne ve bir tarafdan Topal Ali mülküne müntehî olup iki tahtânî beyti ve bir havlu ve ahırı ve bi’r-i mâ ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ile mezbûr Mehmed’e on iki bin yedi yüz nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil merkūm Mehmed’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırra-i mezbûrenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Mehmed vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fî 21 min Şa‘bâni’l-mu‘azzam li sene 1029. Şuhûdü’l-hâl: Ömer Efendi b. Abdülkadı el-İmâm, Sunullah Halîfe b. Osman, Şeyh Musa el-İmâm, Hasan b. Mehmed, Hasan Çelebi eş-şehîr bi Hatîbzâde, Mahmud b. Ferhad, Mehmed Bey b. ( ) er-Râcil, Mustafa b. Mehmed, Ali b. Abdullah, Perviz b. Abdullah, Yakub b. Kurd ve gayruhüm mine’l-hâzırîn.