Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 288 Hüküm no: 340 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Andriye’nin bağını Tagodoş v. Minho’ya rehine vermesi Vilâyet-i Rumeli’nde [İne]bahtı sancağında Yenişehir kazâsı müzâfâtından Fener nâhiyesine tâbi‘ Poskolo [Poskalavo?] nâm karye sâkinlerinden bundan akdem hâlik olan Hristo v. Koma nâm zimmînin evlâd-ı sıgārından Akriyo ve Paroş ve Varsamova nâm sagīrlerinin ammileri oğlu ve kıbel-i şer‘den mansûb vasîleri olan Dimo v. Andriye nâm zimmî meclis-i şer‘de karye-i merkūme ahâlîsinden Tagodoş v. Minho nâm zimmî muvâcehesinde bi’l-velâye ve’l-vesâye ikrâr ve i‘tirâf edip karye-i merkūme ahâlîsi üzerinde Hamza Bey vakfı malından elli altı bin akçe alıp ehl-i karye üzerine tevzî‘ olundukda mürd-i mezbûr hissesine bin dokuz yüz akçe düşüp merkūm Tagodoş benim ma‘rifetim ile karye-i merkūme ahâlîsi meblağ-ı mezbûru kendi malından edâ ve îfâ edip meblağ-ı mezbûr bin dokuz yüz akçe hakk-ı sarîhleri olmuşidi hâlâ karye-i merkūme sınırı dâhilinde vâki‘ bir tarafı Hristo v. Dimo bağına ve bir tarafı Apostol v. Dimo bağına ve bir tarafı Rizo v. Eskondaşlı? bağına ve bir tarafdan yine benim bağıma müntehî ve mahdûd olan bir kıt‘a mülk bağını meblağ-ı mezbûr mukābelesinde mezbûr Tagodoş yedinde rehin vaz‘ eyledim dedikde mezbûr Tagodoş merkūm Dimo’nun bi’l-velâye ve’l-vesâye cârî olan ikrâr ve takrîrini tasdîk ve tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ ve vaz‘ olundu. Hurrire fi’l-yevmi’s-sânî ve’l-ışrîn min Şa‘bâni’l-mu‘azzam li sene 1029. Şuhûdü’l-hâl: Mustafa b. Mehmed, Yani v. Dimo, Todori v. Hristo, Yani v. Petro, Rizo v. Şiro ve gayruhüm mine’l-hâzırîn.