Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 295 Hüküm no: 350 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tırnova’da öldürülen Prefit’in katilinin Yorgi v. Apostol olmadığından zimmetinin ibrası Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Aya Yorgi nâm karyeden olup bundan akdem Tuna yalısında Tırnova kazâsı kurbunda balkan içinde maktûlen mürd olan Prefit nâm zimmînin babası Paroş ve zevce-i metrûkesi Varsoma nâm kimesneler taraflarından husûs-ı âti’l-beyâna vekîl olup vekâleti hasm-ı şer‘î-i câhid mahzarında Yani v. Kasiro ve Hristo v. Dimo nâm zimmîler şehâdetleri ile şer‘an sâbite olan Armağan v. Papa Panayot nâm zimmî meclis-i şer‘-i hatîr-i lâzımü’t-tevkīrde maktûl-i mezbûrun sürücülük san‘atında şerîki olan bâ‘isü’l-kitâb Yorgi v. Apostol nâm zimmî muvâcehesinde bi’l-vekâle takrîr-i kelâm edip mezbûr Yorgi mürd-i mezbûrun şerîki olduğu cihetden zikri sebk eden balkan içinde gālib-i ihtimâl mürd-i mezbûru merkūm Yorgi katl eyledi deyû mezbûru müvekkillerim mezbûrân mazanna ittihâz eylemişler idi el-hâletü hâzihî mürd-i merkūmu zikr olunan balkan içinde yine kendi çobanlarından Ostiko nâm zimmî katl edip mezbûr Yorgi’nin bi vechin mine’l-vücûhi’ş-şer‘iyye husûs-ı mezbûrda min ba‘d medhal ve alâkası olmayıp kātili mezbûr Ostiko olduğu ma‘lûmum olduğu ecilden husûs-ı mezbûra müte‘allik cümle-i da‘vâdan vekâlet-i mahkiyem hasebiyle mezbûr Yorgi’nin zimmetini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’l-vekâle ve gayrıdan bi’l-asâle da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmaya dedikde vekîl-i mezbûru ikrâr-ı meşrûhunda el-mukarru lehü’l-mezbûr Yorgi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin min Şa‘bâni’l-mu‘azzam li sene 1029. Şuhûdü’l-hâl: Mehmed Bey b. Mustafa el-Cündî Mahmud Bey b. ( ) el-Yesârî, Mustafa b. Mehmed el-Muhzır, Ali b. Abdullah el-Muhzır, Yusuf b. Abdullah el-Muhzır, Dimo v. Rizo, Yani v. Apostol, Yani v. Palamar, Hristo v. Dimo, Şiro v. Dimolah ve gayruhüm mine’l-hâzırîn.