Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 295 Hüküm no: 351 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tırnova’da öldürülen Prefit’in ortaklık hissesinin ortağı Yorgi v. Apostol’den alınması Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Aya Yorgi nâm karye sâkinlerinden iken bundan akdem Tuna yalısında Tırnova kazâsı kurbunda balkan içinde maktûlen mürd olan Prefit nâm zimmînin babası Paroş ve zevcesi Varsoma nâm kimesneler taraflarından husûs-ı âti’l-beyânı ahz ve kabza vekîl olup vekâleti hasm-ı şer‘î-i câhid mahzarında Yani v. Kasiro ve Hristo ve Dimo nâm zimmîler şehâdetleri ile şer‘an sâbite ve mütehakkika olan Armağan v. Papa Panayot nâm zimmî meclis-i şer‘-i hatîr-i lâzımü’t-tevkīrde maktûl-i mezbûr Prefit’in sürücülük san‘atında şerîki olan bâ‘isü’l-kitâb Yorgi v. Apostol nâm zimmî muvâcehesinde vekâleten bi’t-tav‘ ve’r-rızâ ikrâr ve takrîr-i kelâm edip maktûl-i mezbûrun mürd-i mezbûr Yorgi şerîki olduğu ecilden mâl-ı şirketden ba‘de külli hesâb mezbûr Yorgi zimmetinde elli beş [bin] akçesi zuhûr etmeğin hâlâ meblağ-ı mezbûr elli beş bin akçeyi mezbûr Yorgi yedinden bi’t-tamâm ve’l-kemâl vekâlet-i mahkiyem hasebiyle ahz ve kabz eyledim dedikde vekîl-i mezbûr Armağan’ın vech-i mübeyyen üzre cârî olan ikrâr ve takrîrini el-mukarru lehü’l-mezbûr Yorgi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâbi‘ min Şa‘bâni’l-mu‘azzam li sene tis‘a ve ışrîn ve elf. Şuhûdü’l-hâl: es-Sâbıkūn.