Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 296 Hüküm no: 352 Orijinal metin no: [54a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Yorgi’nin şüf‘a davasının reddi Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Tomyani nâm karye sâkinlerinden Dimo v. Yorgi nâm zimmî meclis-i şer‘-i hatîr-i lâzımü’t-tevkīrde yine karye-i merkūme sâkinlerinden Todori v. Ligori nâm zimmîyi ihzâr ve mahzarında takrîr-i da‘vâ edip mezbûr Todori karye-i merkūmede vâki‘ mülk menzilime muttasıl Dimo ve Hristo veledey İsteryano nâm zimmîlerin mülk menzillerini yedi bin akçeye iştirâ eylemiş ben şefî‘ olmağın hakk-ı şuf‘am vardır meblağ-ı mezbûr ile kabûl eyledim menzil-i mezbûrdan kasr-ı yed eylesin dedikde mezbûr Todori evvelen zikr olunan menzil-i mezbûrun mülküne muttasıl olmağla anın için hakk-ı şuf‘a olduğunu ve sâniyen bey‘-i istimâ‘ ettikde ahza tâlib olduğunu münkir olıcak müdde‘î-i mezbûrdan da‘vâsına mutâbık beyyine taleb olundukda mehl-i şer‘î taleb etmeğin imhâl olunup ba‘de hulûli’l-mehil beyyineden âciz ve kāsır olmağın merkūm Ligori’ye [Todori’ye] mu‘ârazadan men‘ birle mâ hüve’l-vâki‘ gıbbe’l-ibtigā sebt olundu. Hurrire fî evâili şehri Şa‘bâni’l-mu‘azzam li sene 1029. Şuhûdü’l-hâl: Mehmed Bey b. Abdullah, Mustafa b. Abdullah, İbrahim Bey b. ( ), Ali b. Abdullah, Yakub b. Kurd, Perviz b. Abdullah, Dimo v. Yorgi, Dimo v. Andriye, Yorgi v. İstiranik, Avyaro v. Yorgi, Yorgi v. Dimitri, Franko v. Yorgi.