Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 297 Hüküm no: 353 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pandero v. İstiyo’nun ev, bağ ve hayvan ile tarlalardaki tasarruf hakkını Dimo v. Kirko’ya satması Oldur ki Vilâyet-i Rumeli’nde Avlonya sancağında Arnavud Belgradı kazâsı tevâbi‘inden Belişova nâm karye[den] Pandero v. İstiyo nâm zimmî meclis-i şer‘de işbu râfi‘ü’l-kitâb Dimo v. Kirko nâm zimmî muvâcehesinde bi’t-tav‘ ve’r-rızâ ikrâr ve i‘tirâf edip karye-i merkūmede vâki‘ bir tarafdan Koço v. ( ) mülküne ve bir tarafdan İstemad v. ( ) mülküne ve bir tarafdan Ahmed Beşe mülküne ve bir tarafdan tarîk-i âma müntehî olup bir bâb tahtânî beyti ve cüneyneyi müştemil mülk menzilden ve karye-i merkūmede hâlâ mevcûd olan yirmi re’s silk-i mülkümde münselik koyundan ve bir çift kara [sığır] öküzünden ve yine karye-i merkūme bağları dâhilinde Tepe nâm mevzi‘de vâki‘ iki zeytin ağacını müştemil tahmînen on çapalık bir kıt‘a mülk bağdan dahi nısf-ı şâyi‘lerimi, cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûr Dimo’ya iki bin beş yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘ât-ı mezkûreyi mahallinde kabza müşterî-i merkūmu taslît eylediğimden sonra yine karye-i merkūme sınırında mevâzi‘-i adîdede vâki‘ taht-ı tasarrufumda olan yedi kıt‘a tarladan dahi nısf-ı şâyi‘lerinin hakk-ı tasarrufunu sâhib-i arz ma‘rifetiyle mezbûra tefvîz edip mukābele-i tefvîzde olan beş yüz nakd-i fıddî-i Osmânî râyic fi’l-vakt akçeyi mezbûr Dimo yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘âtın nısfı mezbûr Dimo’nun mülk-i müşterâsıdır ve mârrü’z-zikr tarlanın dahi nısfının hakk-ı tasarrufu mersûmundur sâir emsâli gibi mutasarrıf olsun dedikde gıbbe’t-tasdîk ketb olundu. Hurrire fi’l-yevmi’r-râbi‘ min şehri Ramazâni’l-mübârek li sene 1029. Şuhûdü’l-hâl: Mustafa Beşe b. Abdullah er-Râcil, Ahmed Beşe [b.] Abdullah er-Râcil, Mehmed Beşe [b.] Abdullah er-Râcil, Hüseyin Bey [b.] Abdullah er-Râcil, Hasan Beşe b. Abdullah el-Acemî, Mitro v. Koço, Şimon [v.] Yani ve gayruhüm.