Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 303 Hüküm no: 363 Orijinal metin no: [55b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Lazari’nin evi ile arsa hissesini Rizo v. Franko’ya satması Vilâyet-i Rumeli’nde İnebahtı sancağında Badracık kazâsına tâbi‘ Merdikada nâm karye sâkinlerinden Yani v. Lazari nâm zimmî meclis-i şer‘de işbu hâmil-i hâze’l-kitâb Rizo v. Franko nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Kiryazi v. İstefano mülküne ve bir tarafdan Franko v. İstati mülküne ve bir tarafdan yine benim mülküme ve bir tarafdan tarîk-i âma müntehî ve mahdûd bir tahtânî beyti müştemil olan mülk menzilimi ve yine menzil-i mezbûra muttasıl zât-ı eşcâr-ı müsmire ve gayr-ı müsmireyi hâvî mülk arsa-i hâliyeden sülüsân hisse-i şâyi‘amı bi safkatin vâhidetin mezbûr Rizo’ya bin yüz elli nakd-i fıddî-i Osmânî râyic fi’l-vakt akçeye bey‘ ve kabz-ı semen edip mebî‘-i mezbûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân emlâk merkūm Rizo’nun mülk-i müşterâ-yı sarîhidir keyfe mâ yeşâ mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Rizo vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Nikola v. Yorgi, Nikola v. İstefano, Yani v. Kato, Yorgi v. Yani, Yani v. Kosta, Nikola v. Anastaş, Şiro v. Komiyano, Kosta v. Lazo.