Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 304 Hüküm no: 367 Orijinal metin no: [56a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Pavlo’nun evini Şogo v. İsteryano’ya sattığı Vilâyet-i Rumeli’nde İnebahtı sancağında Gerbeniş kazâsına tâbi‘ Hohlu? nâm karye sâkinlerinden Dimo v. Pavlo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Şogo v. İsteryano nâm zimmî mahzarında ikrâr ve takrîr-i kelâm edip karye-i merkūmede vâki‘ bir tarafdan Yorgi v. Vini mülküne ve bir tarafdan İstemad v. Nilo mülküne ve iki tarafdan Yorgi v. Harekâh mülküne müntehî bir tahtânî beyti ve bostan yerini müştemil olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Sogo’ya iki bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezbûru mahallinde kabza müşterî-i mezbûru taslît eyledim ba‘de’l-yevm sâlifü’l-beyân menzil-i mahdûd merkūm Sogo’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Sogo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’l-hâdî aşer min Ramazâni’l-mübârek li târihi’l-mezbûr. Şuhûdü’l-hâl: Şaban Beşe b. Abdullah, Musli Beşe b. Abdullah et-Teberdâr, Ali b. Abdullah el-Muhzır, Mustafa b. Mehmed el-Muhzır, Vasil v. İstemad, Apostol [v.] Akırı, İstemad v. Dimo, Andriye v. İstemad, Yorgi v. Rivino ve gayruhüm mine’l-hâzırîn.