Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 305 Hüküm no: 369 Orijinal metin no: [56a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. Dimo ile kardeşi Armağan’ın miras hisselerini diğer kardeşleri Yani’ye satmaları Oldur ki Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Floriş nâm karye sâkinlerinden Franko v. Dimo kendi tarafından asâleten ve li ebeveyn karındaşı Armağan nâm zimmî tarafından husûs-ı âti’l-beyânı ikrâra vekîl olup vekâleti Dimo v. Rizo ve İskarlet v. Paroş nâm zimmîler şehâdetleri ile sâbit oldukdan sonra vekâleten meclis-i şer‘de li ebeveyn karındaşları Yani nâm zimmî muvâcehesinde bi’l-asâle ve’l-vekâle ikrâr-ı sahîh-i şer‘î ve i‘tirâf-ı sarîh-i mer‘î kılıp karye-i mezbûre kurbunda vâki‘ babamızdan cümlemize irs-i şer‘le intikāl eden bir bâb harâbe âsiyâb andan bana ve müvekkilim mezbûr Armağan’a isâbet eden hisse-i şer‘iyye-i şâyi‘aları ve yine karye-i mezbûre sınırında vâki‘ bir tarafı Rizo v. Dramite tarlasına ve bir tarafı Yorgi v. Dimo tarlasına ve bir tarafı Çakal tarlasına ve bir tarafı mer‘âya müntehî olan bir kıt‘a mülk çayırdan dahi sülüsân hisse-i şâyi‘a-i mevrûsemiz[i] mezbûr karındaşımız Yani’ye bi safkatin vâhidetin iki bin akçeye bey‘-i bâtt-ı sahîh-i şer‘î ile bey‘ edip kabz-ı semen ettikden sonra mebî‘ân-ı mezbûrânı mahallinde kabza merkūm Yani’yi taslît eyledim dedikde gıbbe’t-tasdîk ketb olundu. Hurrire fî târihi’l-mezbûr. Şuhûdü’l-hâl: Es-Sâbıkūn.