Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 306 Hüküm no: 370 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kemançeci İsmail Ağa’nın çiftlik, bağ, hayvan ve bir takım eşyaları ile tarlaların tasarruf hakkını Mustafa Paşa’ya satması Oldur ki Sarây-ı âmire-i sultânî ve harem-i muhterem-i hâkānî ağalarından fahrü’l-emâsil ve’l-akrân kemânçeci İsmail Ağa b. Seyyid Ağa taraf-ı âlîlerinden husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında nehc-i şer‘î üzre fahrü’l-emâsil İshak Bey b. Hasan nâm bevvâb-ı sultânî ve Mehmed Bey b. Haydar nâm bevvâb şehâdetleri ile sâbite olan Hüseyin Bey b. ( ) nâm bevvâb-ı sultânî meclis-i şer‘-i hatîr-i lâzımü’t-tevkīrde emîrü’l-ümerâi’l-kirâm sâbıkan Bosna Beylerbeyisi olan Mustafa Paşa hazretleri tarafından ikrâr-ı âti’z-zikri tasdîka vekîl olup hasm-ı şer‘î-i câhid mahzarında nehc-i şer‘î üzre fahrü’l-akrân Mustafa Çavuş b. Abdülhay ve Mehmed Çelebi b. Mehmed şehâdetleri ile vekâleti sâbite olan Sefer Ağa b. Abdülmennân mahzarında bi’l-vekâle ikrâr ve bast-ı merâm edip müvekkilim müşârün-ileyh hazretlerinin kazâ-i Havâss-ı Aliyye müzâfâtından Boğluca nâm karye dâhilinde vâki‘ cevânib-i erba‘ası mecbûha?-nişîn-i cinân merhûm Siyavuş Paşa çayırı ve kethüdâ Mustafa Bey mülkü ve eski bağ yeri ve tarîk-i âm ile mahdûd olup dâhiliyyesi iki karşılı odaları ve üç sofayı [ve] bir matbahı [ve] bir kıt‘a bağı [ve] bir su kuyusunu ve eşcâr-ı müsmire ve gayr-ı müsmireyi ve kenîfi muhtevî hadîkayı ve hâriciyyesi der-süflî odaları ve bir çatma anbarı [ve] bir fırını [ve] bir kenîfi ve dört bâb ahırı müştemil olan mülk çiftliklerin bi cemî‘i’t-tevâbi‘ ve’l-levâhık ve kâffeti’l-menâfi‘ ve’l-merâfık ve yedi re’s camus ineği ve bir boğa ve dört dana ve dört re’s kara sığır ineği ve beş re’s kara sığır danası ve iki re’s buzağı ve üç çift camus öküzü ve üç çift kara sığır öküzü ve yüz on beş re’s koyunu ve dört arabayı ve beyne’l-müte‘âkideyn ilm-i şer‘le ma‘lûm çift âlâtın ve karye-i mezbûre haddinde vâki‘ tahdîd ve tavsîfden müstağnî bir göz mülk su değirmeni cümle-i değirmen âlât-ı ile bu emlâk-i mezkûrâtın cemî‘sini ve inde’l-ahâlî ma‘lûmü’l-hudûd olan bir kıt‘a bağı ve bahçeyi müvekkil-i müşârün-ileyh paşa hazretlerine bi safkatin vâhidetin yüz elli bin nakd-i râyic fi’l-vakt akçeye bâtten bey‘ edip semen-i mersûm yüz elli bin akçeyi ki te’kîdü’l-asl nısfı yetmiş beş bin akçe olur müvekkilim merkūm İsmail Ağa müşârün-ileyh Mustafa Paşa hazretleri yedinden tamâmen alıp kabz-ı teslîmât-ı mebî‘ât-ı mezbûrât ettiklerinden sonra yine karye-i mezbûre sınırında vâki‘ cevânibi vâdi ve pınar ve tarîk-i âm ile mahdûd bir kıt‘a çayır-ı kebîrin ve cevânibi Çorbacı tarlası ve koru ve kendi tarlalarıyla mahdûd tahmînen yetmiş keyl tohum alır bir kıt‘a tarlanın ve zikr olunan tarla kurbunda vâki‘ hudûdu ma‘lûme bir kıt‘a korunun ve cevânibi Siyavuş Paşazâde çayırı ve âsiyâb-ı mu‘attal ve tarîk-i âm ile mahdûd beher sene merhûm Sultan Bayezid hazretlerinin evkāfına yüz yirmi akçe mukāta‘alı üç kıt‘a çayırın ve cevânibi Sinan Bey ve Mustafa ve Kâtib çayırları ile mahdûd bir kıt‘a çayırın ve Hasancık Pınarı nâm mevzi‘de vâki‘ Kavakdibi’nde Müftü çayırları ve Mehmed b. Kurd çayırı ve tarîk-i âm ile mahdûd bir kıt‘a çayırın ve yine cevânibi Müftü çayırları ve dere ve pınar ile mahdûd bir kıt‘a çayırın ve Goğaç çayırı demekle meşhûr cevânibi Siyavuş Paşa ve Mehmed Çavuş çayırları ile mahdûd bir kıt‘a çayırın ve Yel değirmeni altında Kuşyuvası demekle ma‘rûf cevânibi Dîvân kâtibi çayırı ve İstirati ve Çakal nâm zimmîler tarlasıyla ve dere ile mahdûd bir kıt‘a çayırın ve cevânib-i erba‘ası Mehmed Çavuş çayırı ve dereye müntehî iki kıt‘a ve Siyavuş Paşa mandırası kurbunda vâki‘ cevânibi Siyavuş Paşa çayırı ve dere ile mahdûd ve Arnavud karyesi bağları mukābelesinde Ayazma kurbunda vâki‘ cevânibi Siyavuş Paşa ve Kurd Bey tarlaları ve Savat deresiyle mahdûd bir kıt‘a tarlanın ve karye-i mezbûre kurbunda cevânibi Balaban nâm zimmî tarlası ve harâbe bağ yeri ile mahdûd tahmînen üç keyl tohum alır bir kıt‘a tarlanın ve Çardak nâm karye sınırında mevâzi‘-i müte‘addidede vâki‘ dört kıt‘a tarla ki hudûdu beynimizde ma‘lûm ve karye-i Boğluca toprağında mevâzi‘-i müte‘addidede vâki‘ inde’l-ahâlî ma‘lûmü’l-hudûd dört kıt‘a tarlanın ve Yel değirmeni önünde vâki‘ cevânib-i erba‘ası Mustafa Kethüdâ ve Dîvân kâtibi tarlası ve tarîk-i âm ile mahdûd bir kıt‘a tarlanın ve Boğazköyü kurbunda vâki‘ hudûdu ma‘lûm değirmen yeri demekle ma‘rûf bir kıt‘a mer‘âyı ve karye-i Boğluca sınırında vâki‘ hudûdu ma‘lûm iki kıt‘a tarlayı ve köprü kurbunda vâki‘ hudûdu ma‘lûm tarlanın ve yine mevzi‘-i mezbûrda vâki‘ cevânibi vâdi ve tarîk-i âma müntehî bir kıt‘a tarlanın ve etrâfı Siyavuş Paşa çayırı ve Sabiha Hâtun mülkü ve tarîk-i âmla mahdûd altı dönüm harâbe bağ yerinin işbu mezkûr olan çayır [ve] mezâri‘in hakk-ı tasarrufunu müvekkil-i müşârün-ileyh sâhib-i arz ma‘rifetiyle mûmâ-ileyh Mustafa Paşa hazretlerine tefvîz edip mukābele-i tefvîzde mütefevviz-i mûmâ-ileyh yedinden elli bin nakid akçeyi tamâmen alıp kabz eylediler min ba‘d mârrü’z-zikr çiftlik ve sâir emlâk-i mezbûre mûmâ-ileyh Mustafa Paşa’nın mülk-i sarîhleridir keyfe mâ yeşâ mutasarrıf olsun dedikde gıbbe’t-tasdîk ketb olundu. Hurrire fî târihi’l-mezbûr. Şuhûdü’l-hâl: Mustafa Bey b. Abdullah el-Cündî Mustafa Efendi el-İmâm, Mustafa Çavuş b. Abdullah Kethüdâ-yı saray, Hasan Bey b. Abdullah el-Bevvâb, Mehmed b. Hasan el-Bevvâb.