Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 308 Hüküm no: 371 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avlonya kadısı Mehmed Efendi’nin borcuna karşılık hanımı Fâtıma Hâtun bt. Şemseddin Efendi’ye evini vermesi Dâr-ı devlet-i aliyye ve makarr-ı saltanat-ı seniyye Kostantıniyye-i mahmiyede Bıçakçı mahallesi sükkânından Avlonya? kadısı olan a‘lemü’l-ulemâ’i’l-izâm efdalü’l-fuzalâi’l-fihâm hallâlü’l-müşkilâti’d-dîniyye ve keşşâfü’l-mu‘addilâti’l-yakīniyye câmi‘ü’l-[fürû‘] ve’l-usûl hâviyü’l-ma‘kūl ve’l-menkūl Davudzâde demekle şehîr Mehmed Efendi b. ( ) el-Müvellâ el-merhûmü’l-mebrûr -ed-dâricü ilâ medâric rahmeti Rabbihi’l-Gafûr- meclis-i hatîr-i lâzımü’t-tevkīrde halîle-i celîlesi bâ‘isetü’l-kitâb fahrü’l-muhadderât zahrü’l-muvakkarât safiyyetü’z-zât melekiyyetü’s-sıfât Fâtıma Hâtun bt. el-merhûmü’l-mebrûr Şemseddin Efendi tarafından tasdîk-i âtîye vekîl olup vekâleti hasm-ı şer‘î-i câhid mahzarında müvekkile-i mûmâ-ileyhâ Fâtıma Hâtun’u ma‘rifet-i şer‘iyye ile ârifân olan Mustafa Çelebi b. İbrahim el-Müderris ve İsmail b. Hüsrev nâm kimesneler şehâdetleri ile şer‘an sâbit ve mütehakkik olan fahrü’l-mehâdîmi’l-kirâm, sülâletü’l-ulemâ’i’l-fihâm mevlânâ Atâullah Çelebi b. el-merhûmü’l-mebrûr Şeyh Mehmed Efendi mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp bundan akdem zevcem müvekkile-i mezbûre Fâtıma Hâtun’a cem‘an karz-ı şer‘îden yüz elli bin nakd-i fıddî-i Osmânî râyic fi’l-vakt akçe deyn-i şer‘îm olup medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Baba Haydar mahallesinde vâki‘ bir tarafı Fethi Çelebi veresesi mülkü ve bir tarafdan Hüseyin b. Abdullah mülküne ve bir tarafdan Murad nâm kimesne vakfı ve bir tarafdan tarîk-i âma müntehî olup muhavvataynı olup muhavvata-i dâhiliyyesi üç fevkānî beyti ve bir tahtânî beyti ve matbahı ve iki su kuyusunu ve kenîfi ve cüneyneyi muhtevî ve muhavvata-i hâriciyyesi iki fevkānî ve bir tahtânî beyti ve bir odayı ve ahırı müştemil olup mülk-i mevrûsum olan menzilimi cümle-i tevâbi‘ ve levâhıkı ile müvekkile-i mûmâ-ileyhâ Fâtıma Hâtun’a yüz elli bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip teslîm-i mebî‘ eylediğimden sonra meblağ-ı mezbûr yüz elli bin akçeyi mukaddemâ müvekkile-i merkūme Fâtıma Hâtun’a olan yüz elli bin akçe deynime takās eyledim min ba‘d menzil-i mezbûr müvekkile-i mûmâ-ileyhâ Fâtıma Hâtun’un mülk-i müşterâ-yı sarîhidir keyfe mâ yeşâ ve haysü mâ yürîd mutasarrıfe olsun dedikde mukırr-ı mezbûr Efendi hazretlerinin vech-i mübeyyen üzre cârî olan ikrâr ve takrîrini vekîl-i mersûm Atâullah Çelebi bi’l-vekâle vicâhen tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. [Târih yazılmamıştır]. Şuhûdü’l-hâl: Mehmed Efendi b. Şemseddin el-Kadı, İbrahim Efendi b. Ahmed el-Müderris, Ali Efendi b. ( ), Abdüllatif Efendi b. Hüseyin el-Müderris, Feridun Halîfe b. Abdülmennân el-İmâm, Bilâl Bey b. Abdullah el-Cündî Mehmed Efendi b. Ali el-Müderris, Süleyman b. Mehmed, Behram Bey b. Mustafa, fahrü’l-mülâzımîn Mehmed Efendi b. el-merhûm Esedüddin, Mehmed b. Ahmed, Ahmed b. Hüseyin ve gayruhüm mine’l-hâzırîn.