Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 310 Hüküm no: 373 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hâtun bt. Sinan’ın evini Sefer Beşe b. Abdullah’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Düğmecibaşı mahallesi sâkinlerinden Kamer Hâtun bt. Sinan meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb suyolcu tâifesinden Sefer Beşe b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Abdi Çelebi b. ( ) mülküne ve bir tarafdan tarîk-i âma ve iki tarafdan Süleyman Bey b. ( ) vakfı’na müntehî ve mahdûd iki tahtânî beyti ve üç sofayı ve fırını ve bi’r-i mâyı ve kenîfi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Sefer Beşe’ye yirmi dört bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân menzil-i mahdûd merkūm Sefer Beşe’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırra-i mezbûrenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Sefer Beşe vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ olundu. Hurrire fi’l-yevmi’l-hâmis min Recebi’l-ferd li târihi’l-mezbûr. Şuhûdü’l-hâl: Feyzullah Çelebi b. el-Hâc Ali el-İmâm, Mustafa b. Hayrullah el-Müezzin, el-Hâc Mahmud el-Bevvâbü’s-sultânî, Kurd b. Abdullah, Mustafa b. Mehmed, Ali b. Abdullah, Perviz b. Abdullah ve gayruhüm.