Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 311 Hüküm no: 374 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya’nın Poganiye kazâsındaki yurt yerini Mikşo v. Lazari’ye satması [Vilâyet-i Rum]eli’nde Avlonya sancağında Poganiye kazâsına tâbi‘ Kerasova nâm karyeden İlya v. ( ) nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Mikşo v. Lazari nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Kini v. Lika mülküne ve bir tarafdan benim mülküme ve iki tarafdan tarîk-i âma müntehî ve mahdûd bir kıt‘a mülk yurd yerimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Mikşo’ya bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân yurd yeri mezbûr Mikşo’nun mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Mikşo bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Ali b. Abdullah, Mustafa b. Mehmed, Yakub b. Kurd, Süleyman b. Turgud, İstamo [v.] Niko, İstati [v.] Yorgo, Dimo [v.] Nikola, Kiryaki [v.] İstamo, İsteryano v. Niko ve gayruhüm mine’l-hâzırîn.