Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 320 Hüküm no: 388 Orijinal metin no: [70a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Astolat’ın Fener nahiyesindeki bağını Kirimiso v. Tanaş’a satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Aya Yorgi nâm karye sâkinlerinden Dimo v. Astolat nâm zimmî meclis-i şer‘de hâmilü’l-kitâb Kirimiso v. Tanaş nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda Portice nâm mevzi‘de vâki‘ bir tarafdan Saso v. Dimo bağına ve bir tarafdan Rizo v. ( ) bağına ve bir tarafdan İsteryo v. Apostol bağına ve bir tarafdan İskarlet v. Domato bağına müntehî zât-ı eşcâr-ı müsmireyi hâvî ve şırahâneyi muhtevî olup tahmînen sekiz dönüm bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfık ile mezbûr Kirimiso’ya sekiz bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip meblağ-ı mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı mahdûd mezkûr Kirimiso’nun mülk-i müşterâ-yı sarîhidir keyfe mâ yeşâ mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Kirimiso bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 13 min Recebi’l-ferd li sene tis‘a ve ışrîn ve elf. Şuhûdü’l-hâl: Mustafa Bey b. Davud el-Cündî Memi Bey b. Abdullah el-Cündî Mehmed Bey b. ( ) eş-şehîr bi Kınıkzâde, Perviz b. Abdullah el-Muhzır, Ali b. Abdullah el-Muhzır, Apostol v. Andon, Şiro v. Dimolah, Şiro v. Tanaş, Kiryazi v. Dimo, Yani v. Zamiri, Hristo v. Yani, Yani v. İstati, Esteryo v. Apostol, Apostol v. İstati, Tanaş v. İskarlet, Armağan v. Hristo, Yani v. Panayot, Apostol v. Sava, Panayot v. Pavlo, Franko v. Nikola, Franko v. Harito, Kosta v. Pankarati, Yani v. İstati, Panayot v. Dimolah ve gayruhüm mine’l-hâzırîn.