Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 321 Hüküm no: 390 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamino v. Andriye’nin bağını Yorgo v. İstemad’a satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Dimyani nâm karye sâkinlerinden Kamino v. Andriye nâm zimmî meclis-i şer‘-i mutahharda, işbu hâmilü’l-kitâb Yorgo v. İstemad nâm zimmî mahzarında ikrâr ve takrîr-i kelâm edip karye-i mezbûre kurbunda vâki‘ bir tarafdan Yorgo v. Riva ve bir tarafdan Nikola v. Virato bağına ve bir tarafdan Nikola v. Mirekon bağına ve bir tarafdan Kamino v. Logori bağına müntehî olan bir kıt‘a mülk bağımı cümle-i tevâbi‘ ve levâhıkı ve âmme-i menâfi‘ ve merâfıkı ile mezbûr Yorgo’ya yedi yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen ettiğimden sonra meblağ-ı mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı mahdûd mezkûr Yorgo’nun mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Yorgo vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olunup yed-i tâlibine vaz‘ olundu. Hurrire fi’l-yevmi’l-hâmis aşer min Recebi’l-ferd li sene tis‘a ve ışrîn ve elf. Şuhûdü’l-hâl: Manol v. Viramo, Yorgo v. İstirati, Sakolyo v. İstirati, Dimitri v. Kosta, İstirinoz v. Avyori.