Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 322 Hüküm no: 391 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hacı Mehmed’in evinin yarısını Ali b. Veli ile Ayşe bt. Ali Hâce’ye satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından merhûm Şeyh Ahmed mahallesi sükkânından Ahmed b. el-Hâc Mehmed nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Ali [b.] Veli ve Ayşe bt. Ali Hâce nâm kimesneler muvâcehelerinde bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan merhûm-ı mezbûr Şeyh Ahmed mescidi’ne ve bir tarafdan merhûm Yakub Ağa vakfı’na ve bir tarafdan Rüstem Beşe b. ( ) mülküne ve bir tarafdan tarîk-i âma müntehî ve mahdûd iki fevkānî ve bir tahtânî beyti ve iki sofayı ve ahırı ve bir su kuyusunu ve zât-ı eşcâr-ı müsmire ve gayr-ı müsmireyi hâvî muhavvata[yı] müştemil mülk menzilimden nısf-ı şâyi‘ini cümle-i tevâbi‘ ve levâhıkı ve kâffe-i menâfi‘ ve merâfıkı ile mesfûrân Ali ve Ayşe’ye on bin nakd-i fıddî-i Osmânî râyic fi’l-vakt akçeye bâtten bey‘ edip teslîm-i mebî‘ eylediğimden sonra meblağ-ı mezbûr on bin akçeyi alâ sebîli’l-münâsafa mezbûrân Ali ve Ayşe yedlerinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûdun nısf-ı mu‘ayyen-i mahdûdunu merkūmân Ali ve Ayşe’nin mülk-i müşterâ-yı sarîhidir keyfe mâ yeşâân mutasarrıf olsunlar dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehümü’l-mezbûrân Ali ve Ayşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâlis aşer min Recebi’l-ferd li sene tis‘a ve ışrîn ve elf. Şuhûdü’l-hâl: Abdürrahim Efendi b. Ömer el-İmâm, Mustafa b. Abdullah el-Muhtesib sâbıkan, Hasan b. Ali el-Mezârî, Ömer b. Süleyman el-Mezârî, Mustafa b. Abdullah er-Râcil, Muharrem Çelebi b. Nesimi, İbrahim Halîfe b. ( ) el-İmâm, Rüstem Beşe b. Abdullah er-Râcil, Hüseyin b. Kubad, Seydî b. Kubad, Ahmed b. Hasan ve gayruhüm mine’l-hâzırîn.